ស្ថាប័ន FIFA ចង់បង្កើតពានថ្មីសម្រាប់ក្លឹបបាល់ទាត់អាជីពលេង៤ឆ្នាំម្ដង
សហព័ន្ធបាល់ទាត់ពិភពលោក ហៅកាត់ថា FIFA គ្រោងបង្កើតពានថ្មីមួយមានឈ្មោះថា Club World Cup ដែលនឹងធ្វើឡើងរៀងរាល់៤ឆ្នាំម្ដង។ បើតាមប្រភពឲ្យដឹងថាពានថ្មីគ្រោងចាប់ផ្ដើមនៅឆ្នាំ២០២១ ក្នុងនោះក្រុមធំៗសរុប២៤នឹងធ្វើការប្រកួតប្រជែងដោយមានប្រទេសចិនធ្វើជាម្ចាស់ផ្ទះ។ ក្រុមដែលធ្លាប់ឈ្នះ Champions League ចំនួន១២ដូចជា Liverpool, Man United, Real Madrid, Barcelona, AC Milan, Bayern, Ajax, Inter Milan, Juventus នឹងត្រូវផ្ដល់សិទ្ធប្រកួតប្រជែង។ គួរបញ្ជាក់ថា បើសិនជាមានវត្តមានរបស់ពានថ្មីនេះមែន FIFA ក៏នឹងត្រូវលុបចោលកម្មវិធី Club World Cup បច្ចុប្បន្នដែលធ្វើរៀងរាល់ឆ្នាំ នៅអំឡុងខែធ្នូ ក៏ដូចជាការលុបចោលពាន Confederations Cup ផងដែរ៕
អ្នកចាំទីចាស់វស្សា Gianluigi Buffon ត្រៀមប្រកាសព្យួរស្រោមដៃក្នុងពេលឆាប់ៗនេះ
អ្នកចាំទីចាស់វស្សា Gianluigi Buffon ត្រៀមប្រកាសចូលនិវត្តន៍ពីបាល់ទាត់នៅសន្និសីទសារព័ត៌មាននៅកីឡដ្ឋាន Allianz Stadium នេះបើតាមការបញ្ជាក់របស់សារព័ត៌មានក្នុងស្រុកមួយបានចេញផ្សាយ។ តាមរយៈភ្នាក់ងារផ្ទាល់ខ្លួនរបស់ Buffon លោក Silvano Martina បានឲ្យដឹងថា៖ “នឹងគ្មានBuffon តទៅទៀតទេ។ ខ្ញុំមិនចង់និយាយអ្វីច្រើនឡើយព្រោះសាមីខ្លួននឹងប្រាប់ពីអ្វីដែលរូបគេធ្វើបន្តនៅក្នុងសន្និសីទកាសែតក្នុងថ្ងៃនេះ”។ ក្រោយបង្ហាញខ្លួនជាង១ពាន់ប្រកួតកីឡាករវ័យ៤០ឆ្នាំនឹងប្រកាសព្យួរស្រោមថ្ងៃមុនលេងប្រកួតចុងក្រោយនៅក្របខ័ណ្ឌកំពូលអ៊ីតាលី បន្ទាប់ពីជួយ Juventus លើកពាន Serie A ៧រដូវកាលជាប់គ្នា និងឈ្នះពាន Coppa Italia ៤រដូវកាលចុងក្រោយ។
ស្ងាត់ៗ! Diego Maradona ក្លាយជាប្រធានក្លិបមួយនៅលីគកំពូលប្រទេសបេឡារូស
លោក Diego Maradona ត្រូវបានតែងតាំងជាប្រធានក្លិបបាល់ទាត់ Dinamo Brest នៅក្នុងលីគកំពូលប្រទេសបេឡារូស។ វីរបុរសបាល់ទាត់អាហ្សង់ទីនវ័យ៥៧ឆ្នាំរូបនេះបានចុះកិច្ចសន្យា៣ឆ្នាំហើយនឹងចូលកាន់តួនាទីនៅក្រោយព្រឹត្តិការណ៍ FIFA World Cup 2018។ លោក Maradona បានចុះចេញពីតួនាទីជាគ្រូបង្គោលក្លិប Al Fujairah នៃលីគទី២អេមីរ៉េតអារ៉ាប់រួមក្នុងខែមេសាឆ្នាំ២០១៨ ក្រោយខកខានក្នុងការនាំក្លិបនេះឈ្នះកៅអីលីគកំពូលដោយស្វ័យប្រវត្តិ។ ក្លិប Dinamo មានមូលដ្ឋាននៅទីក្រុង Brest ភាគនីរតីនៃប្រទេសបេឡារូស នៅជាប់ព្រំដែនជាមួយប្រទេសប៉ូឡូញ។ ពួកគេកំពុងស្ថិតក្នុងលេខរៀងទី៨ក្នុងក្របខ័ណ្ឌ Belarusian Premier League ហើយត្រូវប្រកួតផ្ដាច់ព្រ័ត្ Belarusian Cup នៅថ្ងៃសៅរ៍ទី១៩ខែឧសភាទល់នឹង Bate Borisov។ ក្លិបនេះបញ្ជាក់ថាតួនាទីរបស់លោក Maradona គឺរៀបចំយុទ្ធសាស្ត្រអភិវឌ្ឍន៍ក្លិប។
Rivaldo ប្រាប់ Neymar ថាបើមិនចេញពី PSG ទេគឺមិនអាចឈ្នះពានសំខាន់អ្វីឡើយ
វីរបុរសក្រុមបាល់ទាត់ជម្រើសជាតិប្រេស៊ីល Rivaldo បានលើកឡើងថា Neymar នឹងមិនអាចឈ្នះពានរង្វាន់សំខាន់ៗអ្វីឡើយបូករួមទាំង UEFA Champions League ប្រសិនបើបន្តនៅ Paris saint Germain។ សមាជិកដែលជួយឲ្យក្រុមសាំបាឈ្នះពាន World Cup ឆ្នាំ២០០២ បានបន្ថែមថា៖ “ប្រសិន Neymar មិនចេញពី PSG ទេ គេនឹងមិនឈ្នះពានសំខាន់ៗទេ។ ជាពិសេស Champions League ដែលជាពានប្រជែងសំខាន់ជាងគេ។ លីគនៅបារាំងនៅមានកម្រិតទាបណាស់ បើប្រៀបទៅនឹងលីគប្រទេសអេស្ប៉ាញនិងអង់គ្លេស ហើយគេលេងនៅក្លឹបដែលគ្មានប្រវត្តិអស្ចារ្យទៀត”។ កាលពីពេលថ្មីៗនេះ Neymar កំពុងមានការទាក់ទងពី Real Madrid និង Manchester United ខណៈអ្នកចាត់ការ Zinedine Zidane បានបង្ហាញទស្សនៈរបស់ខ្លួនថា Neymar អាចលេងត្រូវគ្នាល្អជាមួយ Cristiano Ronaldo ថែមទៀតផង។
Fernando Torres៖ ក្តីស្រមៃឈ្នះពានជាមួយ AT Madrid លើកដំបូងក្លាយជាការពិត
ខ្សែប្រយុទ្ធ Fernando Torres បាននិយាយថាការឈ្នះពានរង្វាន់ UEFA Europa League ជាមួយ Atletico Madrid គឺជាក្ដីស្រមៃរបស់ខ្លួនតាំងពីកុមារភាពមកម្ល៉េះ។ អតីតសមាជិក Liverpool និង Chelsea បាននិយាយថា៖ “ការឈ្នះពានជាមួយ Atletico គឺជាក្ដីស្រមៃតាំងពីតូចមក ពេលនេះវាបានក្លាយជាការពិតហើយ។ សម្រាប់ខ្ញុំវាគឺជាការបែកគ្នាដ៏មានន័យបំផុត។ ខ្ញុំតែងតែស្រលាញ់ និងគាំទ្រក្លឹប”។ ខ្សែប្រយុទ្ធសញ្ជាតិអេស្ប៉ាញចំណាយពេល១១រដូវកាលជាមួយក្លឹបមានមូលដ្ឋាននៅម៉ាឌ្រីដ តែទើបតែឈ្នះពានធំលើកទីមួយប៉ុណ្ណោះជាមួយក្លឹប ហើយវាក៏ជាពានលើកចុងក្រោយដែរ ដោយសារ Torres នឹងចាកចេញពី Atletico នៅចប់រដូវកាលដោយអាចផ្លាស់ទៅកាន់ទឹកដីសហរដ្ឋអាមេរិក។ គួររំលឹកថា Atletico បានយកឈ្នះ Marseille ៣ទល់នឹង០ នៅវគ្គផ្ដាច់ព្រ័ត្រកាលព្រឹកមិញ ដោយបីលើកពានធំទីពីររបស់ទ្វីបអឺរ៉ុបជាលើកទី៣ ហើយជាការឈ្នះពានលើកទី៦ក្រោមការដឹកនាំរបស់អ្នកចាត់ការ Diego Simeone ផងដែរ។
Antoine Griezmann ស៊ុត២គ្រាប់ឲ្យ AT Madrid ឈ្នះ Marseille ៣-០ លើកពាន Europa League (មានវីដេអូហាយឡាយ)
ក្លឹបបាល់ទាត់ Atletico Madrid បានក្លាយជាម្ចាស់ជើងឯកពានរង្វាន់ UEFA Europa League ឆ្នាំ២០១៧/១៨ ក្រោយពីយកឈ្នះ Olympique Marseille ដោយលទ្ធផល៣ទល់នឹង០ …
