ខ្សែបម្រើ Dimitri Payet និង ខ្សែប្រយុទ្ធ Anthony Martial រួមទាំង Alexandre Lacazzette គ្មានឈ្មោះក្នុងបញ្ជី…

ក្រុមជម្រើសជាតិព័រទុយហ្គាល់បានបញ្ចេញបញ្ជីឈ្មោះសមាសភាពកីឡាករ២៣រូបដើម្បីត្រៀមទៅប្រកួតនៅក្នុងព្រឹត្តិការណ៍ FIFA World Cup នៅរុស្ស៊ីនាពេលខាងមុខនេះ។ អ្វីដែលគួរឲ្យចាប់អារម្មណ៍នោះគឺ ជិតពាក់កណ្ដាលនៃសមាសភាពកីឡាករដែលឈ្នះជើងឯក Euro 2016 មិនមានវត្តមានឡើយ បន្ទាប់ពីគ្រូបង្គោល Fernando Santos បានសម្រេចជ្រើសរើសកីឡាករ២៣នាក់ចុងក្រោយសម្រាប់ទៅរុស្ស៊ី។ កីឡាករដែលមិនមានឈ្មោះទៅទឹកដីរុស្ស៊ីមានដូចជា Andre Gomes របស់ Barcelona, Renato Sanches របស់ Bayern Munich, Nani របស់ Valencia និង Eliseu របស់ Benfica ជាដើម។ គួរបញ្ជាក់ថា ព័រទុយហ្គាល់ ស្ថិតក្នុងពូល B ដោយត្រូវតតាំងជាមួយ អេស្ប៉ាញ, ម៉ារ៉ុក និង អ៊ីរ៉ង់៕

អ្នកចាំទី Gianluigi Buffon នឹងបង្ហាញខ្លួនលើកចុងក្រោយឲ្យ Juvetus នៅថ្ងៃសៅរ៍ ទី១៩ ឧសភា នេះ ពេលប៉ះ Hellas Verona ក្រោយរួមរស់ជាមួយគ្នាអស់រយៈពេល១៧ឆ្នាំ។ អ្នកចាប់បាល់វ័យ៤០ឆ្នាំបានផ្លាស់ប្ដូរគំនិតនៃការចូលនិវត្តន៍កាល១៥ថ្ងៃមុន ហើយបានទទួលសំណើការងារនៅក្រៅទីលាន។ សមាជិក World Cup អ៊ីតាលី ២០០៦ ប្រាប់ថា សប្ដាហ៍ក្រោយគេនឹងបញ្ជាក់ពីសេចក្ដីសម្រេចចិត្ត ពោលគឺ២ទៅ៣ថ្ងៃ បន្ទាប់ពីលើកពានលីគកំពូលជាមួយក្រុមរហស្សនាមសេះបង្កង់។ ក្រោយ​បង្ហាញ​ខ្លួន​ជាង​១ពាន់​ប្រកួតជាមួយក្រុមរហស្សនាមសេះបង្កង់ ​កីឡាករ​វ័យ​៤០​ឆ្នាំ​នឹងលេង​ប្រកួត​ចុងក្រោយ​នៅ​ក្របខ័ណ្ឌ​កំពូល​អ៊ីតាលី បន្ទាប់ពីជួយ​ Juventus លើក​ពាន​ Serie A ៧​រដូវ​កាល​ជាប់​គ្នា​ និង​ឈ្នះ​ពាន​ Coppa Italia ៤​រដូវ​កាល​ចុង​ក្រោយ​។

អ្នកចាត់ការ Pep Guardiola បានបន្តកិច្ចសន្យាថ្មីដឹកនាំ Manchester City រហូតដល់ឆ្នាំ២០២១ ក្រោយឈ្នះជើងឯក Premier League នារដូវកាលនេះ។ កិច្ចសន្យា​ថ្មី​នេះ​ដែរ​ធ្វើ​ឲ្យ​ Pep នឹង​នៅ​ដឹក​នាំ​​ក្រុមរបស់មហាសេដ្ឋីអារ៉ាប់យូរ​ជាង​ក្រុម​ណា​ទាំង​អស់​ (Barcelona និង Bayern Munich) ចាប់​តាំង​ពី​លោក​ចាប់​ផ្ដើម​អាជីព​ជា​អ្នក​ចាត់ការ​ទូទៅ​លើក​ដំបូង​ក្នុង​ឆ្នាំ​២០០៨​មក។​ បុរសជនជាតិអេស្ប៉ាញនិយាយថា លោករីករាយ និង រំភើបចំពោះការងារនេះ។ លោកពេញចិត្តនឹងធ្វើការជាមួយកីឡាករទាំងអស់រៀងរាល់ថ្ងៃ ហើយតាំងចិត្តថានឹងធ្វើការ​ឲ្យកាន់តែល្អសម្រាប់រដូវកាលថ្មីតទៅមុខទៀត។ គួររំលឹកផងដែរថា បុរស​វ័យ​៤៧​ឆ្នាំ​បាន​ដឹកនាំ​ក្រុមរហស្សនាមមេឃខៀវឈ្នះ​ពាន​ Premier League ជា​ប់កំណត់ត្រា​១០០​ពិន្ទុ​ និង​លើក​ពាន​ League Cup នៅ​រដូវ​កាល​ទី​ពីរ​របស់​ខ្លួន។​

ខ្សែបម្រើ Dimitri Payet អាចមិនមានឈ្មោះក្នុងការទៅលេងព្រឹត្តិការណ៍ FIFA World Cup 2018 ដោយសាររបួសអំឡុងការប្រកួតផ្ដាច់ព្រ័ត្រ Europa League ដែល Marseille ចាញ់ Atletico Madrid។ កីឡាករជម្រើសជាតិបារាំងវ័យ៣១ឆ្នាំរូបនេះបានចាប់ផ្ដើមការប្រកួត ទោះបីមានបញ្ហាភ្លៅមុនកែបាល់ក្ដី។ ប៉ុន្តែរូបគេលេងបានតែ៣២នាទីក៏ត្រូវបង្ខំចិត្តដើរចេញពីទីលានទាំងទឹកភ្នែក និងជំនួសដោយ Maxime Lopez។ អតីតសមាជិក West Ham ខាងលើជាតួអង្គសំខាន់ដែលជួយបារាំងឡើងវគ្គផ្ដាច់ព្រ័ត្រ Euro 2016 ប៉ុន្តែខានលេងឱ្យជម្រើសជាតិតាំងពីខែតុលាឆ្នាំ២០១៧មកម្ល៉េះ។ យ៉ាងណាក្ដី រូបគេបានបង្ហាញសមត្ថភាពយ៉ាងគួរឱ្យទាក់ទាញឡើងវិញជាមួយ Marseille ដើម្បីអន្ទងចិត្តគ្រូបារាំងជាថ្មី តែរបួសប្រហែលបញ្ចប់ក្ដីសង្ឃឹមរបស់គេហើយ។ លោក Didier Deschamps ត្រៀមប្រកាសបញ្ជីឈ្មោះកីឡាករជម្រើសជាតិបារាំងសម្រាប់ World Cup 2018 នៅថ្ងៃព្រហស្បតិ៍ទី១៧ខែឧសភានេះ៕  

ខ្សែប្រយុទ្ធ Sandro Wagner របស់ Bayern Munich បានប្រកាសចូលនិវត្តន៍ពីក្រុមជម្រើសជាតិអាល្លឺម៉ង់ក្រោយមិនជាប់ក្នុងបញ្ជីរបស់អ្នកចាត់ Joachim Low ក្នុងពានរង្វាន់ FIFA World Cup 2018។ ការប្រកាសបែបនេះគឺកើតឡើងក្រោយពេលដែលគ្រូបង្វឹក Joachim Low បានប្រកាសបញ្ជីឈ្មោះកីឡាករទាំង២៣រូបដែលត្រូវបង្ហាញខ្លួននៅប្រទេសរុស្ស៊ី។ ក្នុង​បញ្ជី​នោះ​ដែរ ​គេ​សង្កេត​ឃើញ​មាន​វត្តមាន​របស់ Manuel Neuer ​ដែល​ទើបជាពីរបួស ខណៈ​ដែល Mario Gotze ​មិន​មាន​ឈ្មោះ​ឡើយ ខណៈមិត្តរួមក្រុម Marco Reus មានឈ្មោះក្នុងក្រុមជម្រើសជាតិសារជាថ្មីដោយសង្ឃឹមនឹងចូលលេងក្នុងព្រឹត្តិការណ៍ខាងលើនេះជាលើកដំបូង។ គួររំលឹកថា Wagner ​ស៊ុត​បញ្ចូល​ទី​បាន​៥​គ្រាប់​ក្នុង​ការ​ចូល​លេង​៨​ប្រកួត​ឲ្យក្រុមជម្រើសជាតិ ​ដោយរូបគេក៏​ជា​សមាជិកដែលជួយឲ្យក្រុមរហស្សនាមឥន្រ្ទីដែក​លើក​ពាន​ Confederations Cup កាល​ពី​ឆ្នាំ​មុននៅទឹកដីរុស្ស៊ីផងដែរ។ ដោយឡែក ក្រុមលោក Joachim Low ស្ថិតក្នុងពូល F ជាមួយ ម៉ិចស៊ិចកូ, កូរ៉េខាងត្បូង និង ស៊ុយអែត៕