គ្រូបង្វឹក Real Madrid លោក Zinedine Zidane មិនបានបដិសេធក្នុងការទិញកីឡាករថ្មីចូល នៅខែមករាខាងមុខនេះទេប៉ុន្តែលោកចង់បញ្ជាក់ថាក៏គ្មានកីឡាកររបស់ Real Madrid ណាម្នាក់ត្រូវចាកចេញពីក្លឹបដែរ។
ម្ចាស់ជើងឯក La liga បានយកឈ្នះ Malaga ដោយលទ្ធផល៣ទល់២យ៉ាងពិបាកក្នុងកីឡដ្ឋាន Santiago Bernabeu កាលពីយប់មិញ។ Cristiano Ronaldo ជាអ្នករកគ្រាប់បាល់ជ័យជម្នះក្នុងនាទី៧៦ដោយបាល់បន្ថែមក្រោយទា់បាល់ពិន័យ១១ម៉ែត្រត្រូវអ្នកចាំទីសង្គ្រោះបាន។
ទោះបីជាទទួលជ័យជម្នះស្ដេចស នៅតាមពីក្រោយក្រុម Barcelona៧ពិន្ទុ ហើយចន្លោះ១០ពិន្ទុនឹងកើតឡើងម្ដងទៀត បើក្រុមមួយនេះឈ្នះក្រុមលេខ២ Valencia នៅយប់នេះ។ ខណៈ Sergio Ramos ដែលរបួសបាក់ខ្ទងច្រមុះត្រូវនៅក្រៅទីលានជាមួយនឹង Gareth Bale ក្នុងជំនួបជាមួយ Malagaលោក Zidane បានបើកទ្វារទទួលកីឡាករថ្មីសម្រាប់ទីផ្សារដោះដូរកីឡាករខាងមុខ។
“ គ្មានកីឡាករចាកចេញនោះទេ គ្រប់គ្នានឹងបន្តនៅជាមួយក្លឹប” Zidane និយាយបទសម្ភាសន៍ក្រោយចប់ការប្រកួត។ “ការមកដល់របស់កីឡាករថ្មីអាចនឹងកើតឡើង ប៉ុន្តែយើងរីករាយជាមួយនឹងក្រុមកីឡាករដែលយើងមាន។ យើងមានក្រុមកីឡាករដែលស្មោះស្ម័ក្រ និងគុណភាព។ ប៉ុន្តែពេលនេះ យើងនឹងមិននិយាយពីការចាកចេញ ឬការមកដល់របស់កីឡាករនោះទេ”៕
ប្រភព៖MARCA
