ខ្សែបម្រើកណ្ដាលរបស់បិសាចក្រហមកីឡាករ Ander Herrera បាននិយាយថាបើចង់ឈ្នះពាន Premier League ក្នុងរដូវកាលនេះ Manchester United ត្រូវតែរក្សាទម្រង់លេងល្អឈ្នះគ្រប់ការប្រកួតក្នុងទឹកដីខ្លួនឯង។
មុនពេល Red Devils ទទួលភ្ញៀវ Brighton នៅយប់ថ្ងៃសៅរ៍នេះក្នុងកីឡដ្ឋាន Old Trafford ពួកគេកំពុងតាមពីក្រោយក្រុមម្ចាស់កំពូលតារាង Man City ៨ពិន្ទុ ហើយរក្សាបានកំណត់ត្រាឈ្នះយ៉ាងល្អក្នុង Premier League។
ចំណែក Man Utd លេងក្នុងទឹកដី៦ប្រកួតកន្លងមកឈ្នះទាំងអស់ ដោយរកបាន១៩គ្រាប់ និងរបូតតែមួយគ្រាប់គត់។ ក្រុមរបស់លោក Jose នឹងទទួលក្រុម រំពេសមុទ្រ Brighton ដោយមានទំនុកចិត្ត បន្ទាប់ពីឈ្នះ Newcastle ៤ទល់១ហើយពួកគេនឹងជិតតាមទាន់ក្រុម Man City ដែលនឹងត្រូវជួប Huddersfield នៅថ្ងៃអាទិត្យ។
Herrera បាននិយាយក្នុងទូទស្សន៍ Sky Sport ថា៖” នៅក្នុងផ្ទះយើងត្រូវតែឈ្នះនៅ Old Traffordយើងមិនអាចបណ្ដោយឲ្យពិន្ទុចាកចេញពីយើង។ បើយើងប្រជែងចង់ឈ្នះពាន Premier League យើងត្រូវតែឈ្នះក្នុងផ្ទះរបស់ខ្លួន ហើយគ្រប់ការប្រកួតក្នុង Old Trafford ត្រូវតែឈ្នះ”។
“ ពួកយើងទទួលបានឧទាហរណ៍ល្អកាលពីសប្ដាហ៍មុន ហើយពេលនេះយើងទទួល Brighton ក្នុងកីឡដ្ឋានខ្លួនឯង យើងត្រូវតែឈ្នះគ្រប់ការប្រកួតទោះបី១ទល់០ក៏ដោយ។ យើងនឹងព្យាយាមលេងឲ្យបានល្អ និងអ្វីតាមអ្វីដែលអាចទៅរួច ប៉ុន្តែអ្វីដែលសំខាន់គឺឈ្នះការប្រកួត”៕
