ក្រោយផ្ទេរមក Man Utd បានរួចរាល់១០០% Alexis Sanchez បាននិយាយសរសើរមិត្តរួមក្រុមថ្មីគឺអ្នកចាំទី David De Gea ថាជាកំពូលអ្នកចាំទីល្អជាងគេម្នាក់លើពិភពលោក។
កីឡាករវ័យ២៩ឆ្នាំបានផ្ទេរមកលេងនៅ Old Trafford ដោយចាកចេញពី Arsenal កាលពីថ្ងៃចន្ទជាមួយកិច្ចព្រមព្រៀងផ្ទេរ Henrikh Mkhitaryan ទៅ Arsenal វិញ។ កីឡាករសញ្ជាតិស៊ីលីនឹងធ្វើការហ្វឹកហាត់ ជាមួយមិត្តរួមក្រុមនៅទីលានហ្វឹកហាត់ Carrington Training Centre ហើយរូបគេបាននិយាយសរសើរ Devid De Gea ផងដែរ។
“ខ្ញុំគ្មានពេលទៅដឹងពីពួកគេម្នាក់ៗ ឬក៏ចំណាយពេលជាមួយពួកគេនៅឡើយទេ ប៉ុន្តែពិតណាស់ខ្ញុំស្គាល់ពួកគេពេលលេងទល់នឹងពួកគេកាលពីមុន។ ខ្ញុំជឿថា Devid DeGea គឺជាអ្នកចាំទីល្អបំផុតម្នាក់ ក្នុងចំណោមកីឡាករទាំងអស់ក្នុងពិភពលោក។”
“ គាត់ជាកីឡាករម្នាក់ដែលតែងតែធ្វើឲ្យខ្សែប្រយុទ្ធពិបាកទាត់បញ្ចូលទី ។ ខ្ញុំក៏ធ្លាប់ទាត់បញ្ចូលទីបានមួយគ្រាប់ ដែរតែពិបាកណាស់។ ដូច្នេះវាពិតជាត្រឹមត្រូវណាស់ដែលមានមិត្តរួមក្រុមជាអ្នកចាំទីល្អបំផុតក្នុងលោក”។
អតីតខ្សែប្រយុទ្ធ Barcelona ស៊ុតទម្លុះដៃស្អិតរបស់ DeGea បានតែមួយគ្រាប់ប៉ុណ្ណោះ ក្នុងចំណោម៨ប្រកួតដែលធ្លាប់តទល់គ្នាក្នុង Premier League ហើយពាន League Cup ទល់នឹង De Gea គឺជាការជួបគ្នាចុងក្រោយបំផុត ដែលកាលនោះ កីឡាករអេស្ប៉ាញរក្សាសំណាញ់ទីពីការស៊ុតដ៏គ្រោះថ្នាក់ដល់ទៅ១៣ដងឲ្យ Man Utd ឈ្នះ Arsenal ៣ទល់១ ខណៈមួយគ្រាប់នេះជារបស់ Alexis Sanchez។
Sanchez អាចនឹងចូលលេងលើកដំបូងបំផុតឲ្យ Man Utd ពេលក្រុមរបស់លោក Jose Mourinho ធ្វើដំណើរទៅកាន់កីឡដ្ឋាន Huish Park របស់ក្លឹប Yeovil Town ក្នុងជុំទី៤ពាន FA Cup៕
