តារាបាល់ទាត់របស់ Real Madrid កីឡាករ Cristiano Ronaldo បានប្រកាសកាលពីយប់ម្សិលមិញថារូបបានក្លាយជាឪពុកកូនទី៤ហើយក្រោយពេលមិត្តស្រី Georgina Rodriguez ឆ្លងទន្លេបានកូនស្រី ហើយរូបគេដាក់ឈ្មោះថា Alana Martina។
“Alana Martina ទើបតែកើត! ពីរនាក់ Geo និង Alana សុខភាពល្អ ពួកយើងសប្បាយរីករាយណាស់” កីឡាករវ័យ៣២ឆ្នាំសរសេរក្នុងបណ្ដាញ Twitter របស់ខ្លួនដោយផុសរូបភាព ខ្លួនឯងជាមួយ មិត្តស្រី និងកូនច្បង Cristiano Ronaldo Jr,. និងទារកទើបនឹងកើត។
Ronaldo ក៏ជាឪពុករបស់កូនភ្លោះ Eva និង Mateo ដែលបានកើតកាលពីខែមិថុនា។ កាលពីចុងខែតុលា កីឡាករជម្រើសជាតិព័រទុយហ្គាល់បានផុសវីដេអូ Live ក្នុងបណ្ដាញសង្គមរបស់ខ្លួនហើយបានបង្ហាញពីការដាក់ឈ្មោះកូនទើបនឹងកើតនេះ។
គ្រូបង្វឹកជម្រើសជាតិព័រទុយហ្គាល់បានឲ្យ Ronaldo សម្រាកពីក្រុមជម្រើសជាតិដើម្បីមកមើលថែផ្ដល់ភាពកក់ក្ដៅ ដល់កូនស្រីជាទីស្រឡាញ់ដែលទើបនឹងកើតនេះផងដែរ៕
