ក្លឹបបិសាចក្រហម Manchester United បានបញ្ជាក់ក្នុងវេបសាយផ្ទាល់ខ្លួនថាបានចុះកុងត្រាយកខ្សែបម្រើ Chelsea កីឡាករ Nemanja Matic ហើយកីឡាករជាអ្នកចំណូលថ្មីទី៣របស់ Man Utd។
ទាក់ទងនឹងការមកដល់ Old Trafford, Matic បាននិយាយក្នុងវេបសាយផ្លូវការរបស់ Manchester United ថា៖” ខ្ញុំពិតជាមានមោទនភាពណាស់ ដែលបានមកចូលរួមជាមួយ Man Utd ហើយធ្វើការជាមួយ Jose Mourinho ម្ដងទៀត ដែលនេះគឺជាឱកាសដែលខ្ញុំមិនអាចប្រកែកបាន”។
ចំណែកលោក Jose Mourinho វិញបាននិយាយផងដែរថា៖” Nemanja Matic គឺជាកីឡាកររបស់ Man Utd ហើយក៏ជាកីឡាកររបស់ Jose Mourinho ដែរ។ គាត់នឹងតំណាងគ្រប់យ៉ាងឲ្យយើងក្នុងការប្រកួតបាល់ទាត់ ភាពស្មោះត្រង់ ស្ថេរភាពមហិច្ឆតា និងការលេងជាក្រុម”។
ការមកដល់របស់ Matic នឹងបញ្ចប់បេសកកម្មស្វែងរកខ្សែបម្រើរបស់លោក Jose ហើយកីឡាករវ័យ២៨ឆ្នាំនឹងមានភាគរយខ្ពស់ក្នុងការមកជំនួស Michael Carrick ដែលមានវ័យ៣៦ឆ្នាំទៅហើយ៕
