នាឡិកាបានរោទ៍ឡើងដាស់លោក Julen Lopertegui ថាដល់ពេលវេលាជ្រើសរើសក្រុមកីឡាករជម្រើសជាតិអេស្ប៉ាញសម្រាប់ត្រៀម World Cup 2018 មកដល់នាពេលខាងមុខ ខណៈដែលគ្រូបង្វឹករូបនេះសរសើរ Marco Asensio និង Isco ពីទម្រង់លេងកើនឡើងកាលពីថ្មីៗនេះ។
ខ្សែបម្រើប្រយុទ្ធស្លាបវ័យក្មេង Asensio បានទទួលការចាប់អារម្មណ៍ខ្លាំង ក្រោយពេលបង្ហាញទម្រង់លេងល្អក្នុងជំនួបជាមួយ PSG និង Real Betis។ ក្នុងន័យនេះគ្រូបង្វឹកវ័យ៥១ឆ្នាំបាននិយាយហើយថាកីឡាករទាំងអស់ត្រូេះតែខ្លាំង មានសុខភាពល្អ(មិនរបួស)និងមានទម្រង់លេងល្អបំផុត។
“ អ្វីដែលពួកយើងតែងតែងចង់បាន គឺកីឡាករទាំងអស់ដែលជារបស់យើងយ៉ាងជាក់លាក់ មានសុខភាពល្អ និងរក្សាទម្រង់លេងបានល្អពីមួយកម្រិតទៅមួយកម្រិត ដើម្បីឲ្យពួកគេអាចដឹកនាំក្រុមបានល្អលើទីលាន“គ្រូបង្វឹករូបនេះនិយាយក្នុងសន្និសីទសារព័ត៌មាន Foro Nueva Murciaកាលពីម្សិលមិញ។
“ Isco លេងបានយ៉ាងអស្ចារ្យក្នុងការប្រកួតសំខាន់នៅ Champions League ទល់នឹង PSG ហើយគាត់ជាកីឡាករសំខាន់សម្រាប់ Real Madrid ។ សម្រាប់ Asensio ខ្ញុំក៏គិតដូចគ្នាដែរ។ យើងចង់ឲ្យកីឡាករទាំងអស់ក្លាយជាតារា ហើយសប្បាយរីករាយក្នុងការលេងឲ្យជម្រើសជាតិ ជាជាងភាពភ័យខ្លាចមិនបានលេងពេញលេញក្នុងក្លឹបរបស់ពួកគេ។ នេះជារឿងសំខាន់របស់ពួកយើង“។
រំលឹកផងដែរថាក្រុមគោជល់អេស្ប៉ាញនឹងត្រូវជួបក្រុមឥន្ទ្រីដែកអាល្លឺម៉ង់ និងពពកសអាហ្សង់ទីន ក្នុងលក្ខណៈមិត្តភាពក្នុងមីនាមុនពេលរៀបចំខ្លួនសម្រាប់ World Cup នៅរុស្សី៕
