លោក Jose Mourinho បាននិយាយព្រមានអាជ្ញាកណ្ដាលលោក Michael Oliver ឲ្យប្រយ័ត្នអំពី តិកនិកធ្វើដួលរបស់Manchester City អំឡុងការប្រកួតនៅប៉ុន្មានម៉ោងខាងមុខនេះ។
គ្រូបង្វឹកព័រទុយហ្គាល់ នឹងរៀបចំក្រុមកីឡាកររបស់គាត់លេងទល់នឹង Manchester City នៅ Old Trafford ខណៈគាត់ ចង់កាត់បន្ថយគម្លាតកំពូលតារាង ដែលកំពុងនាំមុខ៨ពិន្ទុក្នុងជំនួបនេះ។ ខណៈពេលដែល City បានបង្ហាញទម្រង់លេងបែបកាចខ្លាំងក្នុងរដូវកាលនេះ ជាមួយនិងកាតលឿងទទួលបាន២៧ដងលើស Manchester United ៦ដងបូលរួមទាំងកាតក្រហម២ដងផងដែរ (Man Utd កាតក្រហមមួយ)នោះ លោក Jose Mourinho បាននិយាយបែបព្រមានខ្លះដល់អាជ្ញាកណ្ដាល។
Mourinho បានជឿជាក់ថាលោក Pep នឹងរៀបចំក្រុមរបស់លោកលេងទម្រង់បែបប្រយុទ្ធច្រើន ដើម្បីបំបែកតំបន់ការពារMan Utd ឲ្យបង្កកំហុសជាច្រើន ដើម្បីឲ្យអាជ្ញាកណ្ដាលពិន័យ ពិសេសល្បិចធ្វើពុតជាដួលនៅនឹងតំបន់គ្រោះថ្នាក់ ឬដំបូលទូក។
“ពួកគេដាក់ខ្សែប្រយុទ្ធច្រើននាក់ ហើយពេលពួកគេបាត់បាល់ ពួកគេនឹងធ្វើឲ្យការប្រកួតគ្មានតុល្យភាព។ ពួកគេមានកីឡាករជាច្រើននៅជុំវិញកន្លែងមានបាល់ ហើយពួកគេពិតជាខ្លាំងនេះគឺជាទម្រង់ប្រយុទ្ធដ៏អស្ចារ្យ។ ប៉ុន្តែពួកគេនឹងផ្លាស់ប្ដូរភ្លាម ពេលពួកគេបាត់បាល់ ហើយច្រើនដងណាស់ពួកគេនឹងត្រូវការធ្វើឲ្យអាជ្ញាកណ្ដាលផ្លុំកញ្ចែពិន័យកំហុស”។
“ វាអាស្រ័យលើអាជ្ញាកណ្ដាល ដើម្បីវិភាគហើយធ្វើការសម្រេចចិត្ត ប៉ុន្តែខ្ញុំមិនអាចនិយាយអំពីរឿងនេះបានទេ”៕
