ប៉ុន្មានម៉ោងមុននេះ គេហទំព័រល្បីៗនៅអង់គ្លេសបានចុះផ្សាយព្រោងព្រាតថា លោក Jose Mourinho កំពុងរៀបចំសំណើយកខ្សែបម្រើកំពូល Assist របស់ក្រុមកាំភ្លើងធំ Arsenal កីឡាករ Mesut Ozil ដែលនឹងផុតកំណត់កុងត្រាពេលចប់រដូវកាលនេះ ហើយនោះ។
គ្រូបិសាចក្រហមរូបនេះ ធ្លាប់ធ្វើការជាមួយកីឡាករជម្រើសជាតិអាល្លឺម៉ង់កាលដឹកនាំ Real Madrid ដោយអ្នកទាំងពីរក៏ជួយក្លឹបអេស្ប៉ាញមួយនេះ លើកពាន La liga និង Copa del Ray មុនកីឡាករវ័យ២៨ឆ្នាំប្ដូរមកលេងនៅកីឡដ្ឋាន Emirates។
Ozil ធ្លាប់ឈ្នះពាន FA Cup ៣ដងនៅ Arsenal ក្រោមការដឹកនាំរបស់លោក Arsen Wenger ប៉ុន្តែអនាគតរបស់គេនៅមិនទាន់ច្បាស់នៅឡើយ។ កុងត្រារបស់Ozil នឹងផុតកំណត់នៅរដូវកាល២០១៧/១៨នេះ ខណៈខ្សែបម្រើជម្រើសជាតិអាល្លឺម៉ង់មិនទាន់បានបន្តកុងត្រាថ្មីផងនោះ។
បើតាមប្រភព Bild របស់អាល្លឺម៉ង់និយាយថា Mourinho នឹងនាំយកគាត់មក Old Trafford ពេលចប់រដូវកាលនេះ។ បិសាចក្រហមនិងក្រុមអ្នកមានបុណ្យចង់បាន Ozil ក្នុងរដូវកាលនេះ ប៉ុន្តែសំណើទាំងអស់ត្រូវបាន Arsenal បដិសេធ។
បែបណាក្ដី! Ozil រីករាយនឹងសម្រេចចិត្តពីអនាគត់របស់ខ្លួនពេលចប់រដូវកាលនេះដែលប្រភពមួយចំនួនថា រូបគេនឹងប្ដូរទៅលេងនៅក្លឹបដែលជាគូប្រជែងពាន Premier League របស់ Arsenal៕
