លោក Jose Mourinho បានផ្ដល់ភ្លើងខៀវឲ្យ Manchester United ធ្វើការផ្ទេរយកកីឡាកររបស់ Benfica ខ្សែការពារស្លាបឆ្វេង Alex Grimaldo នេះបើតាមប្រភពពីប្រទេសព័រទុយហ្គាល់។
បិសាចក្រហមបានតាមឃ្លាំមើលទម្រង់លេងរបស់កីឡាកររូបនេះនៅ Benfica ជាច្រើនប្រកួតមកហើយប៉ុន្តែ កាសែត The Record បញ្ជាក់ថា កីឡាករវ័យ២២ឆ្នាំទទួលបានចំណុចល្អៗជាច្រើន ពិសេសទម្រង់លេងនិងល្បឿនដែលធ្វើឲ្យក្លឹបនៅអង់គ្លេសត្រូវការបំផុត។
កាសែតខាងលើក៏បានបញ្ជាក់ដែរថា Mourinho បាននិយាយពាក្យថា Okឲ្យ Man Utd ធ្វើយ៉ាងណា អន្ទងយកកីឡាករសញ្ជាតិអេស្ប៉ាញរូបនេះ ឲ្យបានក្នុងរដូវដោះដូរកីឡាករខាងមុខ។ Benfica បានស៊ីញេកុងត្រាកីឡាកររូបនេះពីក្លឹប Barcelona ត្រឹមតែ១.៥លានអឺរ៉ូក្នុងខែធ្នូឆ្នាំ២០១៥ហើយពេលនេះ កីឡាករមានតម្លៃខ្លួន៤០លានអឺរ៉ូ(៣៦លានផោន)។
មែនទែនទៅ! United បានធ្វើពាណិជ្ជកម្មជាមួយ Benfica ក្នុងឆ្នាំនេះយ៉ាងជិតស្និត បន្ទាប់ពីស៊ីញេកុងត្រាយក Victor Lindelof ក្នុងតម្លៃ៣១លានផោនកាលពីដើមរដូវកាល។ អ្វីដែលលោក Jose Mourinho ចង់បានកីឡាកររូបនេះ គឺដើម្បីយកជំនួសកីឡាកររបួសច្រើននឹងធ្លាក់ជើង Luke Shaw៕
