អតីតវីរបុរស Arsenal លោក David Seaman បាននិយាយខ្លះៗទាក់ទងទៅនឹងលោក Arsene Wenger ដែលកំពុងដឹកនាំអតីតក្លឹបរបស់ខ្លួននាកីឡដ្ឋាន Emirates Stadium ហើយអ្វីដែលអតីតអ្នកចាំទីរូបនេះ សង្កត់ធ្ងន់នោះគឺ ចង់គ្រូបង្វឹកសញ្ជាតបារាំងចម្លងតិកនិក និងយុទ្ធសាស្ត្រដឹកនាំតាម Jose Mourinho។
មន្ទិលសង្ស័យនៃអនាគតរបស់ លោក Wenger ត្រូវបានបញ្ចប់ ក្រោយពេលគ្រូបង្វឹករូបនេះ បន្តកុងត្រាដឹកនាំ២ឆ្នាំបន្ថែមទៀតនៅ Arsenal។ ការបន្តកុងត្រានេះគឺជាការងារដែលលោកនឹងត្រូវជួបប្រទះភាពតានតឹងមួយចំនួន ដោយសារក្លឹបគូរប្រជែងមានការកែប្រែយុទ្ធសាស្ត្រ។
ក្នុងករណីនេះ អតីតអ្នកចាំទី Arsenal បាននិយាយថាបើ Wenger ចង់ឈ្នះពាន និងជោគជ័យត្រូវយកតម្រាប់តាមលោក Jose Mourinho។ ” Mourinho បានមកដឹកនាំ Man Utd ហើយពួកគេឈ្នះពានបីកាលពីរដូវកាលមុន។ ពួកគេមិនលេងបាល់ស្ថិតក្នុងភាពដ៏ល្អឥតខ្ចោះនោះទេ ប៉ុន្តែវាក៏មិនមានភាពអវិជ្ជមានក្នុងបាល់ទាត់ប៉ុន្មានដែរ។ ពេលដែលខ្ញុំចូលមកលេងនៅ Arsenal ពួកយើងលេងបាល់មិនសូវគួរឲ្យទាក់ទាញប៉ុន្មានទេ ប៉ុន្តែវាមានភាពខ្លាំងហើយឈ្នះពានជាច្រើន។”
ខណៈពេលដែល Wenger ដឹកនាំក្រុមមិនបានលេង Champions League ក្នុងរដូវកាលនេះអតីតអ្នកចាំទីជម្រើសជាតិអង់គ្លេសបាននិយាយថា Wenger គួរមានការផ្លាស់ប្ដូររបៀបដឹកនាំខ្លះៗហើយ។
“ សម្រាប់ខ្ញុំការរក្សា Wenger ២ឆ្នាំបន្តទៀតជាជម្រើសត្រឹមត្រូវតែ Wenger ខ្លួនគាត់គួរតែផ្លាស់ប្ដូររបៀបដឹកនាំខ្លះបើចង់ជោគជ័យម្ដងទៀត។ Mourinho ដឹកនាំ Man Utd តែមួយឆ្នាំ ឈ្នះពាន៣ ហើយមានកៅអីលេង Champions League ដែលនេះ Wenger គួរតែគិតហើយ”៕
