អតីតខ្សែប្រយុទ្ធ Manchester United លោក Eric Cantona បានប្រដូចខ្សែបម្រើរបស់ក្រុមបិសាចក្រហម Paul Pogba ទៅនឹងខ្សែបម្រើវ័យចាស់ Luka Modric របស់ Real Madrid ។
កំពូល Super Star របស់ជម្រើសជាតិបារាំងរូបនេះ លេងបានយ៉ាងល្អពេលចាប់ផ្ដើមរដូវកាល២០១៧/១៨ ដោយរកបាន២គ្រាប់មុនពេលរបួសសរសៃរពួររយៈពេលយូរ កាលពីកញ្ញា ប៉ុន្តែក្រោយត្រឡប់ជាពីរបួសវិញ រូបគេនៅតែបង្ហាញថ្វីជើងបានល្អដូចដើម ពិសេសរកបានមួយគ្រាប់ក្នុងការប្រកួតដែល Man Utd ឈ្នះ Newcastle ៤ទល់១។
Cantona ដែលធ្លាប់លេងនៅ Man Utd ឈ្នះពាន Premier League ៤ដងនៅ Old Traffordនោះជឿថា Pogba សំខាន់នៅMan Utd ដូច Luka Modric មិនអាចខ្វះបាននៅ Real Madrid។ “ ខ្ញុំគិតថាគាត់ពិតជាកីឡាករដែលល្អ ហើយគ្រប់ពេលអ្នកមានកីឡាករល្អដែលទើបជាពីរបួស។ គាត់មានសារៈសំខាន់នៅ Man Utd ដូច Modric នៅ Real Madrid អញ្ចឹង។ ពេលដែល Modric របួស Real ហាក់ដូចជាក្រុមមួយផ្សេងទៀត ដូចដែលអ្នកបានឃើញកាលពី៥ទៅ៦ឆ្នាំមុន។គ្រប់ពេលដែលគាត់របួសក្រុមមិនល្អ ដូចកាលនៅមានគាត់លេងនោះទេ”។ Cantona និយាយក្នុងកាសែត FullTimeDevils។
“ Pogba គឺជាខួរក្បាលនៃក្រុមManchester United ទាំងមូលហើយ Modric គឺជាខួរក្បាលរបស់ Real Madrid អញ្ចឹងដែរ”លោកបានបន្ត។
បន្ទាប់ពីឆ្លងកាត់១២ប្រកួតនៅក្នុងលីកនៃរដូវកាលនេះ United កំពុងឈរលេខ២ក្នុងតារាងលីកកំពូលអង់គ្លេស តាមពីក្រោយក្រុមកំពូលតារាង Man City ៨ពិន្ទុ៕
