គ្រូបង្វឹកក្រុមបិសាចក្រហម Manchester United លោក Jose Mourinho បាននិយាយថាគាត់គ្រោងនឹងឲ្យ Alexis Sanchez លេងនៅតំបន់មួយចំនួន លើទីលានហើយបញ្ជាក់ថា កីឡាករជម្រើសជាតិស៊ីលីអាចលេងបាន៤ដំណែងក្នុងតំបន់ប្រយុទ្ធ។
Sanchez បានហ្វឹកហាត់ជាមួយមិត្តរួមក្រុមថ្មីរបស់ខ្លួនជាលើកដំបូងកាលពីថ្ងៃអង្គារ ហើយគេនឹងថានឹងចូលលេងលើកដំបូងបំផុតឲ្យក្លឹបទល់នឹងក្រុម Yeovil Town ក្នុងពាន FA Cup ជុំទី៤។ មានការពិភាក្សាគ្នាជាច្រើន ពីការមកដល់របស់Alexis ថាតើកីឡាករស៊ីលីសាកសមលេងនៅកន្លែងណាក្នុងកីឡដ្ឋាន Old Trafford ប៉ុន្តែលោក Jose Mourinho បានបដិសេធពីការលេងតែមួយដំណែងរបស់ Sanchez ហើយលោកបាននិយាយថាគាត់អាចលេងបួនដំណែងខុសៗគ្នា។
“កន្លែងណាក៏ដោយឲ្យតែនៅតំបន់ប្រយុទ្ធ” Jose បានឆ្លើយតបពេលសួរពីកន្លែងដែលនឹង Sanchezលេង។
“ ខ្ញុំស្គាល់គាត់ជាច្រើនឆ្នាំមកហើយ ខ្ញុំធ្លាប់ឃើញគាត់លេងនៅ Udinese របស់អ៊ីតាលី ក្នុងប្រទេសអេស្ប៉ាញ ពេលលេងឲ្យ Barcelona ក្នុងប្រទេសអង់គ្លេសពេលគាត់លេងឲ្យ Arsenal ដូច្នេះហើយអាជីពរបស់ពួកយើងស្ទើរតែនៅជាមួយគ្នាទៅហើយ ដូច្នេះខ្ញុំស្គាល់គាត់ច្បាស់ណាស់”។
“ ខ្ញុំឃើញគាត់លេងស្ដាំ លេងឆ្វេង ជាខ្សែប្រយុទ្ធ ហើយពីក្រោយខ្សែប្រយុទ្ធ នេះគឺជាតួនាទីរបស់ Alexis។ ខ្ញុំឃើញគាត់លេងក្នុងប្រព័ន្ធតិកនិកជាច្រើន ទស្សនវិជ្ជាខុសគ្នាៗជាច្រើន និងគ្រូបង្វឹកខុសៗគ្នា ខ្ញុំឃើញគាត់ជោគជ័យគ្រប់ប្រទេស គ្រប់គ្រូបង្វឹក និងគ្រាប់តួនាទីដែលគាត់លេង។ ដូច្នេះគាត់លើសពីកីឡាករម្នាក់ ដោយសារគាត់មានការជំរុញលើកទឹកចិត្ត។ គាត់អាចលេង៤ដំណែងខុសៗគ្នា”៕
