ខ្សែបម្រើរបស់ក្រុម Barcelona កីឡាករ Andres Iniesta និយាយថាជំនួប Clasco នៅថ្ងៃសៅរ៍ជាមួយនឹង Real Madrid មិនអាចសម្រេចពីការប្រកួតប្រជែងពាន La liga បានទេ ទោះបីគាត់គិតថាការឈ្នះការប្រកួតនេះ នឹងធ្វើឲ្យគម្លាតពិន្ទុកាន់តែដាច់ឆ្ងាយ។
ក្រុមកំពូលតារាង La liga, Barcelona កំពុងនាំក្រុមលេខ២ AT. Madrid ៦ពិន្ទុ ប៉ុន្តែលើសក្រុមឈរលេខ៤Real Madrid ១១ពិន្ទុ តែស្ដេចសនៅសល់មួយប្រកួតក្នុងដៃ។ នៅដើមរដូវកាលនេះក្លឹបមានប្រភពពី Catalan បានបង្ហាញទម្រង់លេងល្អឥតខ្ចោះ ដោយឈ្នះការប្រកួតទាំងអស់ក្រោមការដឹកនាំរបស់លោក Eresto Valverde ទោះបីជាលក់ Neymar ចេញក៏ដោយ ខណៈកីឡាករជំនួស Ousmane Debeleទើបលេងបាន២ប្រកួតដោយសាររបួសសរសៃពួរ។
ការជួបគ្នានេះ Iniesta ជឿថា Barcelona នឹងបន្ថែមគម្លាតពិន្ទុដល់ទៅ១៤ ដើម្បីបញ្ចប់ក្ដីសង្ឃឹមប្រជែងពានរបស់ក្រុមលោក Zinedine Zidane។
“ និយាយឲ្យស្មោះត្រង់ទៅ ខ្ញុំមិនគិតអញ្ចឹងទេ” Iniesta ឆ្លើយតបសំណួរដែលសួរថាប្រសិនបើ Barcelona ឈ្នះការប្រកួតនេះនឹងបញ្ចប់ក្ដីសង្ឃឹមលើកពានរបស់ Real Madrid ដែរឬទេ?
“ វាពិតជាពិបាក ក្នុងការនិយាយពីពាន La liga ក្នុងខែធ្នូ។ វាពិតជាគួរឲ្យជឿថា ប្រសិនបើយើងអាចឈ្នះនោះយើងនឹងឈានដល់ជំហានមួយទៀត តែយើងមិនអាចបំភ្លេច At. Madrid នោះទេ ដែលកំពុងតាមយើងពីក្រោយ៦ពិន្ទុ។ ពួកយើងទន្ទឹងរងចាំលេងការប្រកួតដ៏អស្ចារ្យនេះ ហើយព្យាយាមយកបីពិន្ទុ“៕
