Alvaro Morata បានបង្ហាញអារម្មណ៍មិនអាចសម្របខ្លួនជាមួយក្លឹបនៅទីក្រុងឡុងដុងរួចទៅហើយ។ រូបគេបានបង្ហាញការស្ដាយក្រោយដែលចាកចេញពីReal Madrid មកលេងនៅ Chelsea នេះបើតាមការបញ្ជាក់ជាច្រើនពីបណ្ដាញផ្សព្វផ្សាយនៅអេស្ប៉ាញ។
កីឡាករវ័យ២៤ឆ្នាំ បានត្រឹមកីឡាករបម្រុងប៉ុណ្ណោះ ក្រោយពេលទាត់បញ្ចូលទីក្នុងការប្រកួតដែល Chelsea ចាញ់ Burnley៤-២កាលពីថ្ងៃសៅរ៍។ ទោះបីជាយ៉ាងនេះក្ដី កីឡាករហាក់ផ្សាភ្ជាប់ជីវិតរបស់ខ្លួនក្នុងប្រទេសអង់គ្លេសមិនទាន់បាន ខណៈថ្មីៗនេះ Morata ត្រូវបានគេរាយការណ៍ថា កំពុងជួបសភាពតឹងតែងជាមួយ ជីវិតនៅអង់គ្លេស ហើយបានប្រាប់អតីតមិត្តរួមក្រុមនៅ Real Madrid ដោយបានប្រាប់ពួកគេថាស្មៅនៅអង់គ្លេសមិនមានសភាពពណ៌បៃតងដួចនៅអេស្ប៉ាញទេ។
តាមប្រភព Diario Gol បានបញ្ជាក់ថា គាត់កំពុងមានអារម្មណ៍ឈឺក្បាលជាមួយបណ្ដាញផ្សព្វផ្សាយព័ត៌មាននៅអង់គ្លេស ខណៈសាររបស់ Morata ផ្ញើទៅអតីតមិត្តរួមក្រុមតាមរយៈ What-app ថាគាត់ពិតមិនសប្បាយចិត្ត។ Morata បាននិយាយកាលពីសប្ដាហ៍មុនក្នុងបទសម្ភាសន៍ជាមួយ Marca ថាគាត់មានអារម្មណ៍ថាមានសម្ពាធខ្លាំងណាស់ ជាមួយនឹងការផ្ទេរមកលេងដោយទឹកលុយយ៉ាងច្រើន។
“ ខ្ញុំអាចនិយាយបានថា វាពិតមានសារៈសំខាន់ណាស់អំពីចំនួននេះ ប៉ុន្តែខ្ញុំត្រូវមានបុគ្គលិកលក្ខណៈ ស្ងប់ស្ងាត់សិន ដើម្បីស្នាក់នៅជាមួយក្លឹប។ ខ្ញុំមានការប្រកួតមុនបើករដូវកាលតែ២ប្រកួតប៉ុណ្ណោះ លេង១៥នាទីក្នុងការប្រកួតផ្លូវការ ហើយទាត់ប៉េណាល់ទីអត់ចូល ។ ពួកគេសឹងតែសម្លាប់ខ្ញុំទៅហើយដូច្នេះខ្ញុំដឹងថានឹងត្រូវប្រឈមជាមួយអ្វីទៀតនៅខាងមុខ។”
