គ្រូបង្វឹក Liverpool លោក Jurgen Klopp បានស្ថិតក្នុងការចាប់អារម្មណ៍ពីស្ដេចស Real Madrid ខណៈដែលក្លឹបមួយនេះកំពុងចង់បានគ្រូបង្វឹកសញ្ជាតិអាល្លឺម៉ង់មកជំនួសប្រសិនបើ Zinedine Zidane អាចនឹងចាកចេញនៅរដូវកាលនេះ។
ទោះបីជានាំក្លឹបប្រចាំទីក្រុងម៉ាឌ្រីដរក្សាដង្ហើមក្នុង Champions League ហើយអាចនឹងឡើងវគ្គ៤ក្រុមចុងក្រោយ Real Madrid ដែលបាត់បង់ពានក្នុងស្រុកក្រោមដៃ Barcelona អាចនឹងធ្វើឲ្យលោក Zidane មានអនាគតស្រពេចស្រពិល។
តាមប្រភព The Sun, ប្រសិនបើ Zidane ចែកផ្លូវគ្នាជាមួយ Real Madrid ក្លឹបនៅអេស្ប៉ាញមួយនេះនឹងរកលោក Jurgen Klopp មកជំនួស។ Klopp ស្ថិតក្នុងរ៉ាដារបស់ Real ក្រោយសម្រេចស្នាដៃជាច្រើនជាមួយ Dortmund ហើយបច្ចុប្បន្នលោកកំពុងនាំ Liverpool ពង្រឹងខ្លួននៅ Champions League ដោយឈ្នះMan City ៣ទល់០មានសង្ឃឹមខ្ពស់ក្នុងការឡើងទៅវគ្គ៤ក្រុមចុងក្រោយដែរ។
ចំណែកBayern Munich មានព័ត៌មានចចាមអារ៉ាមចង់បានគាត់ទៅដឹកនាំនៅរដូវកាលក្រោយផងដែរប៉ុន្តែ Real Madrid ដាក់គាត់ក្នុងលេខរៀងទីមួយ។ Liverpool នឹងជួបជាមួយ Man City ក្នុងជើងទី២ពាន Champions League វគ្គ៨ក្រុមចុងក្រោយនៅល្ងាចថ្ងៃអង្គារ៍នេះ៕
