Real Madrid កំពុងឈានទៅរកការចាប់អារម្មណ៍ខ្សែបម្រើនាំលេងរបស់ Tottenham កីឡាករ Dele Alli ហើយកិច្ចព្រមព្រៀងនេះមានខ្សែបម្រើ Mateo Kovasic ជាផ្នែកមួយនៃការដោះដូរនេះ ដើម្បីនាំយកកីឡាករវ័យក្មេងប្រកបដោយបទពិសោធន៍មកលេងនៅ Bernabeu។
តាមប្រភព Don Balon កីឡាករវ័យ២១ឆ្នាំស្ថិតក្នុងគោលដៅចម្បងរបស់លោក Florentino Perez។ កុំភ្លេចថាកុងត្រារបស់Alli នៅ Spurs ផុតកំណត់នៅឆ្នាំ ២០២២ឯណោះ ប៉ុន្តែមិនអាចឲ្យប្រធានក្លឹបមហាសេដ្ឋីមួយនេះ រារែកក្នុងការទិញយកនោះទេដោយសារទេពកោសល្យដ៏ល្អនេះ ហើយទើបលោកចង់បានខ្លាំង។
តែកិច្ចព្រមព្រៀងត្រូវបានគេឃើញថា Real Madrid មិនត្រឹមតែចំណាយលុយទិញប៉ុណ្ណោះទេ តែក្លឹបមានមូលដ្ឋាននៅទីក្រុងម៉ាឌ្រីដអាចបន្ថែមខ្សែបម្រើ Kovasic ជាថ្នូរដើម្បីឲ្យ Spurs ព្រមលក់។ កីឡាករវ័យ២៣ឆ្នាំរូបនេះ មិនងាយបានចូលលេងជម្រើសដំបូងនោះទេ ហើយសូម្បីតែបម្រុងក៏ដោយ ដោយសារលោក Zidane មានជម្រើសជាច្រើននៅតំបន់បម្រើ។
វាហាក់មិនអាចកើតឡើងនោះទេ ដែលមាន់ខ្នាយមាសចង់លក់កីឡាករចេញពីឈុតយុវជនរបស់ខ្លួន ប៉ុន្តែមិនហ៊ានថាដែរសម្រាប់សាមីខ្លួនកីឡាករចង់ផ្ទេរចេញឬក៏អត?
ថ្មីៗនេះ Alli ត្រូវបានគេដឹងថាកំពុងស្វែងរកភ្នាក់ងារផ្ទាល់ខ្លួនមួយ ដើម្បីបង្ខំឲ្យបានចេញពី White Hard Land ហើយកាសែតអង់គ្លេស Mirror ដឹងថាភ្នាក់ងាររបស់ C. Ronaldo លោក Jorge Mendes និងភ្នាក់ងាររបស់ Paul Pogba លោក Mino Raiola ស្ថិតក្នុងក្រសែភ្នែករបស់ Dele Alli៕
