លោក Jose Mourinho បង្កើនគុណភាពប្រយុទ្ធនៅ Manchester United ដោយដាក់គោលដៅយកកីឡាករជំនាញជើងឆ្វេង៤នាក់ក្នុងរដូវដោះដូរកីឡាករខាងមុខនេះ។
វាអាចនឹងក្លាយជារដូវកាលដោះដូរកីឡាករដ៏មមាញឹកបំផុតនៅ Old Trafford ខណៈបិសាចក្រហមត្រូវបានគេរាយការណ៍ថា នឹងនាំយកកីឡាករជំនាញជើងឆ្វេងដល់ទៅ៤រូប ដើម្បីបង្កើនសមត្ថភាពក្រុមឲ្យដល់កំពូល ខណៈដែល Man Utd កំពុងតែតាមពីក្រោយ Man City។
កីឡាករដែលគ្រូបង្វឹកសញ្ជាតិព័រទុយហ្គាល់ចង់បានបំផុតមិនអាចលាក់បាំងបាននោះគឺ Danny Rose, Mesut Ozil, Antoine Griezmann និង Gareth Bale។ តាមប្រភព Manchester Evening News និយាយថាលោក Jose Mourinho បានកំណត់អត្តសញ្ញណនិងទុកដំណែងមួយចំនួនដើម្បីពួកគេ។
ខ្សែការពារស្លាបឆ្វេងរបស់ Tottenham កីឡាករ Danny Rose មានបំណងចង់មកលេងនៅ Man Utd អំឡុងពេលធ្វើបទសម្ភាសន៍កាលចុងរដូវកាលមុន ។ បច្ចុប្បន្នតំបន់ស្លាបឆ្វេង កំពុងមានបញ្ហាខ្លះនៅ Old Trafford ទោះបីជា Ashey Young កំពុងតែបង្ហាញទម្រង់លេងល្អនៅរដូវកាលនេះ ប៉ុន្តែលោក Jose Mourinho ដាក់គោលដៅយក Danny Rose ដែលមានជំនាញការពារស្លាបឆ្វេងពីកំណើតស្រាប់។
Antoine Griezmann និង Gareth Bale គឺជាខ្សែប្រយុទ្ធជំនាញជើងឆ្វេង២រូប ក្នុងចំណោម៤រូបដែលអតីតគ្រូបង្វឹក Chelsea ចង់បានបំផុតក្នុងរដូវកាលនេះ។ រូបគេមានព័ត៌មានជាប់ទាក់ទងធ្វើការផ្ទេរមកលេងនៅ Old Trafford ទោះបីជាធ្លាប់បដិសេធកាលពីរដូវកាលមុន។ កីឡាករចុងក្រោយគឺ Mesut Ozil ដែលមានកុងត្រាផុតកំណត់នៅរដូវកាលនេះហើយ ហើយរូបគេនឹងក្លាយជាកីឡាករគ្មានតម្លៃខ្លួន។ បន្ទាប់ពីធ្លាប់ធ្វើការជាមួយគ្នានៅ Real Madrid អ្នកទាំងពីរចង់ធ្វើការជាមួយគ្នាម្ដងទៀតនៅ Man Utd។ លោក Jose Mourinho គឺជាអ្នកគាំទ្រដ៏ងប់ងល់ម្នាក់របស់ Ozil។
កីឡាករជំនាញជើងឆ្វេង៤រូបនេះគឺគោលដៅធំបំផុតរបស់ Man Utd និង លោក Jose Mourinho ពិតហើយ ព្រោះពួកគេសាកសមបំផុតទៅនឹងទស្សនៈវិជ្ជារបស់លោក។ តើប្រិយមិត្តគិតថាលោកក Jose Mourinho អាចយកកីឡាករទាំងបួននាក់បានដែរឬទេ?
