កីឡាករមានតម្លៃខ្ពស់បំផុតលើពិភពលោក Neymar មានម្ដងនោះ ត្រូវបានគេទម្លាយថាតម្លៃខ្លួនត្រឹម១០លានអឺរ៉ូប៉ុណ្ណោះដែលតម្លៃនេះធ្វើឲ្យក្លឹបជាច្រើនគិតថាថ្លៃពេក ហើយការចុះកុងត្រាក៏គ្មានដែរ។
ទម្រង់លេងរបស់កីឡាករសញ្ជាតិប្រេស៊ីល ចាប់តាំងផ្ទេរទៅលេងនៅទីក្រុងប៉ារីសមកកាន់តែល្អឡើងៗ ដែលការចំណាយ២២២លានអឺរ៉ូរបស់ PSG ពិតជាត្រឹមត្រូវហើយ រូបគេត្រូវបានគេចាត់ទុកជាទូទៅថាអនាគតម្ចាស់ពាន Ballon d’Or ពេលដែល Messi និងRonaldo ចាកចេញ។
អាជីពបាល់ទាត់របស់ Neymar ចាប់ផ្ដើមនៅអឺរ៉ុបមានតម្លៃ៨៨លានអឺរ៉ូ ក្រោយពេលចាកចេញពី Santos មក Barcelona កាលពីឆ្នាំ២០១៣ ខណៈដែលក្លឹបអេស្ប៉ាញមួយនេះ គ្មានជម្រើសរក្សាទុក ហើយក៏លក់កីឡាករវ័យ២៦ឆ្នាំរូបនេះទៅឲ្យPSG។
ប៉ុន្តែតម្លៃខ្លួនមុនដំបូងរបស់គេ ប្រហែលជាខុសពីនេះឆ្ងាយសម្រាប់អាជីព Neymar។ កាលពីឆ្នាំ២០០៨ បន្ទាប់ពីបានឃើញទម្រង់លេងរបស់ខ្សែប្រយុទ្ធប្រេស៊ីលលេងឲ្យ Santos ក្នុងពានយុវជន Mediterranean Cup, ក្លឹប Lokomotiv Moscow បានដេញថ្លៃក្នុងទឹកប្រាក់១០លានអឺរ៉ូ។
ទោះបីជាមានការយល់ព្រមពី Santos ប៉ុន្តែក្លឹបយក្សរុស្សីមួយនេះ សូញសាញច្រើន ហើយទុកពេលពិចារណាលើ Neymar ក្នុងហេតុផលច្រើនយ៉ាង។ ប្រធានក្លឹបរុស្សីខាងលើលោក Nikolai Naunov បានប្រាប់ Sport-Express ថា៖” ពួកយើងបានគិតពីស្ថានភាព ថាតើសាកសមដែរអត់ បើទិញយកមកលេង។ យើងពិតចង់ទិញគាត់ ហើយភ្នាក់ងាររបស់យើងបានមើលគាត់លេងនៅប្រេស៊ីល។ វាពិតជាមានការសង្ស័យច្រើនមែន ដំបូង គាត់នៅក្មេងពេក ទី២ វាមិនច្បាស់ថាតើគាត់អាចសម្របខ្លួនទៅនឹងប្រទេសរុស្សីបានអត់! អញ្ចឹងហើយយើងសម្រេចចិត្តមិនទិញគាត់វិញ”។
“កាលនោះតម្លៃប្រហែល១០លានអឺរ៉ូអីហ្នឹង។ ពិតណាស់! អ្នកដឹងហើយថា ចំណាយលុយច្រើនសម្រាប់កូនក្មេងម្នាក់មកពីទ្វីបផ្សេងគ្នា អ្នកត្រូវតែប្រយ័ត្នជាមួយរឿងនេះ”។
ជំនួសការមិនបដិសេធមិនទិញ Neymar, Lokomotiv សម្រេចចិត្តផ្ដល់ការទុកចិត្តខ្លាំងទៅលើកីឡាករ Alan Gatagov ដែលលេងឲ្យក្រុម Levadia Tallinnរបស់ប្រទេសអេស្តូនី មុនពេលក្លឹបដោះលែងឲ្យចេញ។ ពេលនេះកីឡាកររុស្សីគ្មានក្លឹបលេងមួយឆ្នាំហើយ។
“ បាទ! យើងជាអ្នកបាត់បង់នៅទីបំផុត ប៉ុន្តែកាលនោះខ្ញុំមិនបានចំណាំថា Neymar លេងបានល្អដូចកីឡាករដទៃទៀតទេ។ Alan Gatagov ពិតល្អនោះពេលនោះ”។
Neymar បានចូលលេងពេញលេញលើកដំបូងឲ្យ Santos ក្នុងឆ្នាំ២០០៩ ហើយក្លឹបនៅអឺរ៉ុបផ្សេងទៀតចាប់ផ្ដើមកត់ចំណាំមុនពេលក្លឹបមានកីឡដ្ឋាន Camp Nou ឈ្នះក្នុងការដេញថ្លៃយកហត្ថលេខារបស់ Neymar។ ពេលនេះគាត់ក្លាយជាកីឡាករថ្លៃបំផុតក្នុងពិភពបាល់ទាត់គ្រប់សម័យកាល ប៉ុន្តែរូបគេធ្លាប់ជាកីឡាករដែលមានតម្លៃ១០លានអឺរ៉ូហើយគេមិនទិញទៀត៕
