Lionel Messi ត្រូវបានគេចាត់ទុកថាកីឡាករបាល់ទាត់ម្នាក់ល្អបំផុត ក្នុងចំណោមកីឡាករល្អៗផុតលេខក្នុងប្រវត្តិសាស្ត្រគ្រប់សម័យកាល។ ខ្សែប្រយុទ្ធ Barcelona និងជម្រើសជាតិអាហ្សង់ទីនរូបនេះ បានបង្កើតស្នាដៃនិងកំណត់ត្រាជាច្រើនស្ទើរតែរាប់មិនអស់ក្នុងអាជីពរបស់ខ្លួនរយៈពេលជាង១០ឆ្នាំកន្លងមក។
ទោះបីជាយ៉ាងនេះក្ដី! គាត់មានវ័យ៣០ឆ្នាំទៅហើយៗ ក៏នៅមានរឿងរ៉ាវជាច្រើនទៀតដែលគាត់ត្រូវបំពេញ ហើយក៏មានកំណត់ត្រាជាច្រើនទៀតមិនទាន់ធ្វើបាននៅឡើយដែរ។ ខាងក្រោមជាកំណត់ត្រា១០យ៉ាងដែលកីឡាករកូនពីរម្នាក់នេះមិនទាន់សម្រេចបាន៖
១-ចូលលេងឲ្យ Barcelona បានច្រើនជាងគេបំផុត៖
Messi ចូលលេងឲ្យ Barcelona បាន៦២១ប្រកួតហើយចាប់តាំងពីរបង្ហាញខ្លួនឲ្យក្លឹបលើកដំបូងកាលពីវ័យជំទង់កាលពីឆ្នាំ ២០០៤។ប៉ុន្តែស្ថិតិនេះរូបគេឈរនៅលំដាប់លេខ៤ ក្នុងចំណោមកីឡាករលេងបានច្រើនប្រកួតជាងគេឲ្យ Barca។
កីឡាករ២នាក់ដែលនៅពីលើគាត់គឺ Xavi លេងបាន៧៦៧ប្រកួត ខណៈ Carles Puyol លេងបាន៦៦៣ប្រកួត។យ៉ាងណាកីឡាករ២នាក់នេះបានចាកចេញពីក្លឹបទៅហើយ។ ចំណែកកីឡាករម្នាក់ទៀតដែលឈរលើ Messi នោះគឺប្រធានក្រុមបច្ចុប្បន្ន Andrea Iniesta ដែលលេងបាន៦៥៧ប្រកួតហើយគាត់ក៏នៅតែលេងឲ្យក្រុមអ្នកមានបុណ្យដដែល។ អញ្ចឹងមានន័យថា Messi ត្រូវលេងជាច្រើនឆ្នាំទៀតសិនទើបអាចតាមស្មើឬលើសកីឡាករ៣រូបនេះ។
២- ជាកីឡាករ Barcelona រកបានគ្រាប់បាល់ច្រើនជាងគេក្នុង Copa del Rey
តាមពិតទៅកំណត់ត្រាហាក់មិនសូវពិបាកប៉ុន្មានទេសម្រាប់ Messi ព្រោះគេអាចលេងបានច្រើនប្រកួតទៀត។ គ្រាប់បាល់៤៧គ្រាប់ដែលក្រុម Barcelona រកបានក្នុង Copa del Rey មាន Messi ១៨គ្រាប់ នៅតាមពីក្រោយអតីតកីឡាករ Josep Samitier លេងជំនាន់សង្គ្រាមលោកលើកទី១ច្រើនគ្រាប់ទៀត។ Messi រកបាន៥គ្រាប់ក្នុងការចូលលេង៤ប្រកួតចុងក្រោយក្នុងរដូវកាលនេះ ។ វានឹងមានពេលមិនយូរទេសម្រាប់ Messi ដើម្បីបំបែកកំណត់ត្រានេះ។
៣-កីឡាករចូលលេងឲ្យជម្រើសជាតិអាហ្សង់ទីនបានច្រើនជាងគេ៖
Messi បានក្លាយជាកីឡាកររកបានគ្រាប់បាល់ច្រើនជាងគេឲ្យជម្រើសជាតិអាហ្សង់ទីនរួចទៅហើយ ហើយពេលនេះរូបគេកំពុងតែស្វែងរកផ្លូវបំបែកកំណត់ត្រាអ្នកចូលលេងច្រើនជាងគេ។ បច្ចុប្បន្នរូបគេចូលលេងបាន១២៣ប្រកួត តែនៅតាមពីក្រោយចំនួនចូលលេងរបស់អតីតកីឡាករចូលនិវត្តន៍លោក Javies Zanetti ដែឡលេងបាន១៤៣ប្រកួត។ Javier Mascherano នៅតែលេងឲ្យជម្រើសជាតិ ខណៈកីឡាកររូបនេះលេងបាន១៣៩ប្រកួតឯណោះ។
៤- កីឡាករអាហ្សង់ទីនរកគ្រាប់បាល់ច្រើនបំផុតក្នុងវគ្គផ្ដាច់ព្រ័ត្រ World Cup
នៅទីនេះមិនមែនចង់និយាយពីការរកបានគ្រាប់បាល់ក្នុងវគ្គផ្ដាច់ព្រ័ត្រលើកពាននោះទេ តែចង់និយាយពីការរកគ្រាប់បាល់ក្នុងការទៅលេងនៅ World Cup ដែលប្រទេសណាមួយធ្វើជាម្ចាស់ផ្ទះ។ សម្រាប់ Messi រកបានត្រឹមតែ៥គ្រាប់ប៉ុណ្ណោះក្នុងការចូលលេង១៤ប្រកួតក្នុង World Cup ។ Gabriel Batistuta(ចូលនិវត្តន៍) ជាកីឡាកររកបានគ្រាប់បាល់ច្រើនជាងគេបំផុតក្នុងចំណោមកីឡាករអាហ្សង់ទីនទាំងអស់ ដោយរកបាន១០គ្រាប់។ ការចូលលេងនៅ World Cup នៅរុស្សីជាឱកាសសម្រាប់ Messi បន្ថែម៥ឬ៦គ្រាប់ទៀត ដើម្បីបំបែកកំណត់ត្រាកីឡាករអាហ្សង់ទីន។
៥- កីឡាកររកបានគ្រាប់បាល់ច្រើនជាងគេក្នុង UEFA Champions League៖
Messi កំពុងបានប្រជែងជាមួយ Ronaldo នៅកំណត់ត្រាជាច្រើនមកហើយតែអ្វីដែល Messi មិនទាន់ធ្វើបាន គឺរកគ្រាប់បាល់បានច្រើនបំផុតក្នុង Champions League ខណៈដែល Ronaldo កំពុងកាន់កាប់ហើយបន្តរកបន្ថែមយ៉ាងច្រើនទៀតនោះ។ Ronaldo រកបាន១១៦គ្រាប់ហើយក្នុងពានធំជាងគេលំដាប់អឺរ៉ុប ខណៈដែល Messi តាមពីក្រោយ ដោយគ្រាប់បាល់៩៨គ្រាប់។
៦- អ្នកបានគ្រាប់បាល់ច្រើនជាងគេបំផុតក្នុងលីកកំពូលទាំង៦
កំណត់ត្រាមួយទៀតដែល Ronaldo កំពុងនាំមុខ Messi គឺគ្រាប់បាល់ច្រើនជាងគេបំផុតក្នុងលីកកំពូលទាំង៦នៅអឺរ៉ុប។ CR7 ដែលធ្លាប់លេងនៅព័រទុយហ្គាល់ អង់គ្លេស មុនពេលផ្ទេរមកអេស្ប៉ាញរកបាន៣៨៣គ្រាប់ហើយ ខណៈ Messi រកបាន៣៦៩គ្រាប់។
៧- អ្នករកបានគ្រាប់បាល់ Hat-Tricks ច្រើនជាងគេក្នុង La liga៖
ការទាត់បាល់បញ្ចូលទី៣គ្រាប់ ឬលើសក្នុងមួយប្រកួតវាកម្រណាស់សម្រាប់កីឡាករជាច្រើន។ ប៉ុន្តែ Messi កំពុងស្វែងរកផ្លូវដែលអាចរកបានច្រើនជាងកំណត់ត្រាបច្ចុប្បន្នរបស់ខ្លួន។ កីឡាករកម្ពស់១.៧០ម៉ែត្ររកបាន២៨ដងហើយគិតក្នុង La liga។ អញ្ចឹងក៏ដោយកីឡាករអាហ្សង់ទីន ត្រូវតាមពីក្រោយ Ronaldo ដោយកីឡាករព័រទុយហ្គាល់រកបាន៣៣ដងគិតតែក្នុង La liga។
៨- កីឡាករដែលទាត់បញ្ចូលទីច្រើនប្រកួតជាប់គ្នាក្នុងទឹកដីខ្លួនឯង៖
Messi កាន់កំណត់ត្រាជាច្រើនក្នុងនាមជាកីឡាកររកគ្រាប់បាល់នៅ La Liga ប៉ុន្តែកំណត់ត្រាមួយនេះ Messi ធ្វើមិនទាន់បាននៅឡើយទេ។ អតីតកីឡាករ Barcelona ជំនាន់សង្គ្រាមលោកលើកទី២ លោក Mariano Martin រកបានគ្រាប់បាល់ក្នុងផ្ទះខ្លួន១៨ប្រកួតជាប់ៗគ្នានៃពាន La liga ចន្លោះឆ្នាំ១៩៤២ ដល់ឆ្នាំ១៩៤៣។ វាពិបាកដូចស្ពាយថ្មឡើងភ្នំ សម្រាប់Messi ដែលចង់បំបែកកំណត់ត្រាមួយនេះ។ កីឡាករដទៃទៀតក៏ពិបាកនឹងអាចធ្វើបានដែរ។
៩- កីឡាករចូលលេងក្នុងវគ្គផ្ដាច់ព្រ័ត្រពាន Champions League ច្រើនជាងគេ
តាមពិតទៅ Messi ជាប់ទាក់ទងក្នុងភាពជោគជ័យនៃការឈ្នះពាន Champions League ៤ដងជាមួយ Barcelona ហើយរូបគេបានចូលលេងក្នុងវគ្គផ្ដាច់ព្រ័ត្រ៣ដងគឺឆ្នាំ២០០៩, ២០១១ និង២០១៥។ អញ្ចឹងក៏ដោយកាលលេងវគ្គផ្ដាច់ព្រ័ត្រឆ្នាំ២០០៦ ជាមួយ Arsenal Messi មិនបានដាក់ឲ្យលេងនោះទេ ដោយសារនៅក្មេងពេកហើយរូបគេត្រឹមមានឈ្មោះទៅលេងប៉ុណ្ណោះ។ ចំណែកកីឡាករលេងវគ្គផ្ដាច់ព្រ័ត្រច្រើនជាងគេគឺ Andrea Iniesta លេងបាន៤ដង។
១០-កីឡាករបង្ហាញខ្លួនក្នុងជំនួប El Clasico ច្រើនជាងគេ៖
មិនអាចប្រកែកបានដែល Messi ជាកីឡាកររកបានគ្រាប់បាល់ច្រើនជាងគេក្នុង El Clasico ដោយស៊ុតចូល Real Madrid ១៦គ្រាប់ ប៉ុន្តែយ៉ាងណាក៏ដោយរូបគេមិនទាន់អាចក្លាយជាកីឡាករបង្ហាញខ្លួន ក្នុងការប្រកួតស៊ីសាច់ហុតឈាមអង្កាមឆ្អឹងមួយនេះនោះទេ។ ចំណែកកីឡាករលេងបានច្រើនជាងគេគឺអតីតខ្សែការពារ Real Madrid កីឡាករ Manuel Sancis ដែលបានលេងទល់នឹង Barcelona ៤៣ដង។ Messi លេងបាន៣៧ដងស្មើជាមួយ Sergio Ramos៕
