Neymar គួរតែមានឱកាសល្អជាងនេះដើម្បីឈ្នះពាន Ballon d’Or ប្រសិនណាបើគាត់លេងនៅ Real Madrid ។នេះគឺជាសម្ដីរបស់ប្រធានក្លឹប Real លោក Florentino Perez។
ក្នុងពិធីទទួលពានបាល់មាសនេះកាលពីយប់មិញ Neymar បានត្រឹមចំណាត់ថ្នាក់លេខបីប៉ុណ្ណោះ ដោយតាមពីក្រោយMessi និងRonaldo។ ការផ្ទេរទៅលេងនៅ PSG ក្នុងតម្លៃខ្លួន២២២លានអឺរ៉ូ ដោយចាកចេញពី Barcelona រូបគេធ្លាប់បាននិយាយថាមានគោលបំណងឆក់ឱកាសឈ្នះពាន Ballon d’Or នៅថ្ងៃអនាគតដែរ។
ប៉ុន្តែ Perez ប្រធានក្លឹប Real Madrid គិតថា Neymar គួរតែមានសំណាងជាងនេះ បើនៅកីឡដ្ឋាន Bernabeu។ សម្ដីរបស់លោក ត្រូវបានកាសែត Marca ស្រង់មកដូច្នេះ៖ “នៅ Real Madrid ប្រហែលជាមានភាពងាយស្រួល ដើម្បីឈ្នះពានBallon d’Or។ Real Madrid គឺជាក្លឹបមួយដែលនឹងផ្ដល់គ្រប់យ៉ាង តាមដែលអ្នកត្រូវការដូចជាកីឡាករកំពូលៗដែរ។មនុស្សគ្រប់គ្នាដឹងថា ខ្ញុំធ្លាប់ចង់ចុះកុងត្រាយកគាត់ម្ដងដែរតើ”៕
