អតីតខ្សែប្រយុទ្ធ Real Madrid កីឡាករ Alvaro Morata បានទទូចថារូបគេមកចូលរួមជាមួយ Chelsea ដោយសារក្លឹបអង់គ្លេសមួយនេះ ជាក្លឹបល្អជាងគេនៅអង់គ្លេសហើយកីឡាករចង់ធ្វើការជាមួយលោក Antonio Conte។
កីឡាករវ័យ២៤ឆ្នាំនឹងមកដល់ Chelsea ដើម្បីពិនិត្យសុខភាពនៅថ្ងៃនេះ បន្ទាប់ពីតោខៀវយល់ព្រមចុះកុងត្រាក្នុងតម្លៃ៧១លានផោនជាមួយ Real Madrid កាលពីថ្ងៃពុធ។ កីឡាករជម្រើសជាតិអេស្ប៉ាញប៊ិះ នឹងមកលេងនៅ Man Utd ទៅហើយប៉ុន្តែបិសាចក្រហមបែរជាកាត់មុខ Chelsea ទិញយក Romelu likaku ជំនួសវិញ។
Morata ដែលគេរំពឹងទុកថានឹងតាំងលំនៅនៅ Old Trafford នោះបែជាប្ដូរទៅលេងកីឡដ្ឋាន Stamford Bridge វិញដោយធ្វើឲ្យរូបគេមានឱកាសលេងក្រោមការដឹកនាំរបស់លោក Antonio Conte ជាលើកដំបូង។ គ្រូបង្វឹកសញ្ជាតិអ៊ីតាលីបានទិញMorata ពី Real Madrid កាលពីឆ្នាំ២០១៤ឲ្យ Juventus ប៉ុន្តែភ្លាមៗលោកបានទៅដឹកនាំក្រុមជម្រើសជាតិអ៊ីតាលី មុនពេលMorata បានទៅដល់ ហើយកីឡាករបាននិយាយថា Conter គឺជាផ្នែកដ៏ធំមួយឲ្យគេសម្រេចចិត្ត ប្ដូរមកលេងនៅក្លឹបក្នុងទីក្រុងឡុងដុង។
“ ដោយសារវា(Chelsea)ជាក្លឹបល្អជាងគេ។ Conte គឺជាគ្រូបង្វឹកម្នាក់ក្នុងចំណោមគ្រូបង្វឹកល្អលើពិភពលោក។ ហើយខ្ញុំពិតជាសប្បាយក្នុងការធ្វើការជាមួយ Antonio”។
អតីតកីឡាកររបស់ Juventus ត្រូវបានអ្នកកាសែតសួរពីការខិតជិតទៅលេងនៅ Man Utd ហើយក្នុងរដូវកាលនេះប៉ុន្តែរូបគេបាននិយាយថា៖” ខ្ញុំអត់ដឹងដែរ។ រឿងដែលសំខាន់គឺខ្ញុំនៅទីនេះ ខ្ញុំនឹងលេងឲ្យChelsea”៕
