ក្រុមណាហ្គាវើលបានប្រកួតឈ្នះក្រុមភ្នំពេញក្រោន២ទល់១ក្នុងពានរង្វាន់ Hun Sen Cup 2017 វគ្គ៨ក្រុមចុងក្រោយជើងទី១ក្នុងពហុកីឡដ្ឋានជាតិដែលទើបតែចប់នៅមុននេះបន្តិច។
ក្រុមរបស់លោក មាស ចាន់ណា រកបានមួយគ្រាប់នាំមុខមុននៅវគ្គទី១នាទី១៩ ដោយខ្សែបម្រើ សុះ ស៊ូហាណា ហើយលទ្ធផលនេះបន្តរហូតដល់ចប់វគ្គទី១។ ចូលវគ្គទី២ ក្រុមភ្នំពេញក្រោនរកបានគ្រាប់បាល់តាមស្មើវិញ ដោយខ្សែបម្រើប្រយុទ្ធ ប្រាក់ ធីវ៉ានាទី៦៨។ បែបណាក្ដី! លទ្ធផលស្មើនេះមិនទាន់បញ្ចប់ទេ ដោយខ្សែបម្រើ សុះ ស៊ូហាណាដដែល បានរកគ្រាប់បាល់ជ័យជម្នះឲ្យណាហ្គាវើលមួយគ្រាប់ទៀតនៅចុងម៉ោងនាទី៨៨ ហើយលទ្ធផលបន្តរហូតដល់ចប់ការប្រកួតតែម្ដង។
ការប្រកួតនៅជើងទី ២ នឹងត្រូវធ្វើឡើងនៅថ្ងៃទី ២២ ខែ វិច្ឆិកា ឆ្នាំ ២០១៧ខាងមុខ ដើម្បីស្វែងរក ៤ក្រុមចុងក្រោយធ្វើការប្រកួតប្រជែងគ្នាបន្តទៀតក្នុងវគ្គពាក់កណ្ដាលផ្ដាច់ព្រ័ត្រ៕
រូបភាព៖PPFC, NAGAWORLD FC
