ខ្សែបម្រើ Real Madrid កីឡាករ Luka Modric បានបញ្ជាក់ពីគោលបំណងរបស់ខ្លួន ដោយគាត់ចង់បញ្ចប់អាជីពបាល់ទាត់នៅ Real Madrid តែម្ដង។
កីឡាករក្រូអាត បានមកចូលរួមជាមួយស្ដេចសដោយចាកចេញពី Tottenham កាលពីឆ្នាំ២០១២ហើយគាត់បាននិយាយថាកាលនោះគឺជាក្ដីសុបិនរបស់គាត់ដែលផ្ទេរមកលេងនៅ Real ហើយសល់ពីនេះគាត់ចង់ព្យួរស្បែកជើងបាល់ទាត់នៅReal Madrid តែម្ដង។
អាជីពនៅកីឡដ្ឋាន Bernabeu, Modric បានអភិវឌ្ឍន៍ខ្លួនក្លាយជាខ្សែបម្រើនាំលេងល្អបំផុតនៅក្នុងពិភពបាល់ទាត់ ដោយជួយ Real Madrid ឈ្នះពាន Champions League ៣ដង UEFA Super Cup ៣ដង FIFA Club World Cup ៣ដង និងពាន La liga ម្ដងផងដែរ។
និយាយក្នុងកាសែត “ Codere”កីឡាករវ័យ៣២ឆ្នាំបានប្រាប់ពីការស្រឡាញ់ Real Madrid ហើយចង់បញ្ចប់អាជីពជាមួយក្លឹប។ “ស៊ីញេកុងត្រាជាមួយ Real Madrid គឺក្ដីសុបិនក្លាយជាការពិត។ មិនសូវមានកីឡាករច្រើននោះទេ ដែលចូលនិវត្តន៍នៅទីនេះ ប៉ុន្តែយើងនឹងចាំមើលថាមានអ្វីកើតឡើងចំពោះខ្ញុំ”។
“ គោលបំណងរបស់ខ្ញុំគឺចូលនិវត្តន៍នៅទីនេះ ប៉ុន្តែអ្វីៗអាចផ្លាស់ប្ដូរយ៉ាងរហ័សនៅក្នុងពិភពបាល់ទាត់”៕
