ក្រុមជម្រើសជាតិកម្ពុជា នឹងត្រូវជួបក្រុមហ្សកដានីក្នុងការប្រកួតវគ្គជម្រុះជុំចុងក្រោយពានរង្វាន់ AFC Asian Cup 2019 នៅក្នុងពហុកីឡដ្ឋានជាតិ។ កាលជើងទីមួយក្រុមកម្ពុជា បានប្រកួតចាញ់ហ្សកដានីដល់ទៅ៧ទល់០។
ក្នុងសន្និសិទកាសែតមុនការប្រកួតនៅព្រឹកនេះ លោកប្រាក់ សុវណ្ណារ៉ា បាននិយាយថា វាជាការប្រកួតដ៏តឹងតែងបំផុតក្នុងអាជីពគ្រូបង្វឹករបស់លោក ហើយក្រុមហ្សកដានីជាក្រុមដែលអ្នករាល់គ្នាបានដឹងហើយ ពីកម្រិតបច្ចេកទេស កម្លាំងនិងមាឌ។
លោកបាននិយាយថា៖”ខ្ញុំមិនចាំបាច់និយាយច្រើនទេ បងប្អូនបានដឹងហើយ ពីកម្រិតលេងរបស់គូប្រកួត។ ការប្រកួតថ្ងៃស្អែកត្រឹមតែស្មើគឺជាកំណត់ត្រាប្រវត្តិសាស្រ្តហើយសម្រាប់កម្ពុជា”។
“បើនិយាយពីបច្ចេកទេសលេង កម្លាំង ក្រុមរបស់យើងពិតជាមិនអាចប្រៀបជាមួយហ្សកដានីបានឡើយប៉ុន្តែ កលល្បិច និងចិត្តសាស្រ្តគឺជារឿងមួយដែលយើងមិនអាចមើលឃើញ។ តែយើងណាយើងខិតខំសម្រាប់ប្រកួតនេះ”៕
