ក្លឹបជើងឯក Premier League ២០១៧ Chelsea បានសម្រេចកិច្ចព្រមព្រៀងមួយជាមួយ Real Madrid ទិញយកខ្សែប្រយុទ្ធ Alvaro Morata ហើយ។
កាលពីប៉ុន្មានម៉ោងមុននេះ Chelsea បានឈានដល់ដំណាក់កាលចុងក្រោយចំណាយលុយដល់ទៅ៨០លានអឺរ៉ូ(៧១លានផោន)។ការផ្ទេរនេះបានមកពីការស្នើរសុំ របស់លោក Conte ដែលបានបង្ហាញការចាប់អារម្មណ៍ កីឡាករជម្រើសជាតិអេស្ប៉ាញ តាំងពីរដូវកាលមុនមកម្ល៉េះ។
ការមកដល់របស់ Morata នឹងបញ្ចប់ការស្វែងរកខ្សែប្រយុទ្ធថ្មី ក្រោយពេលបរាជ័យក្នុងនាំយក Romelu Lukaku ដែល Man Utd ទិញមុនបាត់ទៅហើយនោះ។ កាលពីថ្មីៗនេះអតីតកីឡាកររបស់ Juventus កំពុងស្ថិតនៅក្នុងទីក្រុង Los Angeles ធ្វើការហ្វឹកហាត់ និងប្រកួតមុនបើករដូវកាលប៉ុន្តែ ពេលនេះរូបគេរៀបចំធ្វើដំណើរទៅទីក្រុងឡុងដុង ដើម្បីបញ្ចប់ការផ្ទេររបស់ខ្លួនទៅកាន់ Stamford Bridge។
កិច្ចព្រមព្រៀងនេះនឹងធ្វើឲ្យកីឡាករវ័យ២៤ឆ្នាំ ក្លាយជាកីឡាករសញ្ចាតិអេស្ប៉ាញមានតម្លៃខ្លួនថ្លៃជាងគេបំផុតក្នុងប្រវត្តិសាស្រ្ត គឺលើសតម្លៃខ្លួនរបស់ Fernando Torres ដែល Chelsea ចំណាយលុយ៥០លានផោនទិញពី Liverpool កាលពីឆ្នាំ ២០១១។
Morata ទៅលេងនៅ Chelsea លើកនេះគឺនឹងមកជំនួស Costa ដែលបានចាកចេញហើយក្លឹបអង់គ្លេសមួយនេះ នឹងមានកីឡាករសញ្ចាតិអេស្ប៉ាញ៥នាក់ហើយ៕
