ខ្សែ​ប្រយុទ្ធ​ Olivier Giroud ត្រូវ​បាន​អនុញ្ញាត​ឲ្យ​ចាក​ចេញ​ពី​ក្រុម​កាំភ្លើង​ធំ​បន្ទាប់​ពី​លោក Arsene Wenger ទិញ​បាន​ Aubameyang ​កាល​ពី​ម្សិលមិញ​ក្នុង​តម្លៃ​៥៦​លាន​ផោន។

Conte បាន​សម្លឹង​ឃើញ​ខ្សែ​ប្រយុទ្ធ​បារាំង​រូប​នេះ​យូរ​មក​ហើយ​ ប៉ុន្តែ​កិច្ច​ព្រមព្រៀង​ទើប​តែ​ឈាន​ដល់​ដំណាក់​កាល​ជោគជ័យ ​ក្រោយ​ក្លឹប​ទាំង​ពីរ​យល់ព្រម​លើ​តម្លៃ​នៃ​ការ​ដោះដូរ។ ទោះ​បី​ជា​យ៉ាង​នេះ​ក្ដី​!​ឆន្ទៈ​របស់​លោក Wenger ចង់​ជួយ​ឲ្យ ​Giroud សម្រេច​បំណង​នៃ​ការ​ផ្ទេរ​ ដោយ​គាត់​ដឹង​ថា​អតីត​កូន​សិស្ស​សំណព្វ​របស់​គាត់​ម្នាក់​នេះ​ ជាកីឡាករ​សំខាន់​ឲ្យ​ជម្រើស​ជាតិ​បារាំង​ ហើយ​តម្លៃ​ខ្លួន​របស់​គេ​ត្រឹម​តែ​១៨​លាន​ផោន​ប៉ុណ្ណោះ​ ក្នុង​ការ​ផ្ទេរ​ទៅ ​Chelsea ប៉ុន្តែ​បូក​រួម​តម្លៃ​ផ្ទេរ​១៥.៣​លាន​ផោន​ និង​លុយ​បន្ថែម​២.២​លាន​ផោន​ទៀត។

បន្ទាប់​ពី​ចំណាយ​ពេល​៥​ឆ្នាំ​កន្លះ​ជាមួយ​កាំភ្លើង​ធំ ​Giroud បាន​ទៅ​ពិនិត្យ​សុខភាព​ជាមួយ ​Chelsea កាល​ពី​ព្រឹក​ថ្ងៃ​ពុធ​មុន​ពេល​ស៊ីញេ​លើ​ក្រដាស​កុង​ត្រា​ថត​កាន់​អាវ។ កីឡាករ​វ័យ​៣១​ឆ្នាំ​ស៊ីញេ​កុង​ត្រា​រយៈ​ពេល​១៨​ខែ​​ ជាមួយ​នឹង​ជម្រើស​ត​មួយ​ឆ្នាំ​ទៀត។

 

Giroud នឹង​ពាក់​អាវ​លេខ​១៨​ នៅ​ក្រុម​​តោខៀវ​ហើយ​ក្នុង​អំឡុង​ចុះ​កុង​ត្រា​រូប​គេ​និយាយ​ដូច្នេះ៖ ” Chelsea គឺ​ជា​ក្រុម​ដ៏​ធំ​​បំផុត​មួយ​ក្នុង ​Premier League ។ ពួក​គេ​បាន​ឈ្មោះ​ពាន​ច្រើន​ជាង​គេ​ក្នុង​រយៈ​ពេល​៦ទៅ​៧​ឆ្នាំ​ចុង​ក្រោយ​នេះ។​ វា​ជា​ក្លឹប​ដ៏​អស្ចារ្យ​ហើយ​ខ្ញុំ​មាន​មោទនភាព​ដែល​ចុះ​កុង​ត្រា​ជាមួយ ​Chelsea ហើយ​ខ្ញុំ​កំពុង​ទន្ទឹង​រងចាំ​ចូល​លេង”៕