Rio Ferdinand អតីតខ្សែការពាររបស់ Man Utd បាននិយាយថាគាត់គួរ តែសរសើរដល់អតីតក្លឹបរបស់ខ្លួន ដែលអាចនាំយកកីឡាករនាំលេង Mesut Ozil មកកាន់កីឡដ្ឋាន Old Trafford ពេលចប់រដូវកាលនេះ។
Ozil នៅសល់កុងត្រាជាមួយ Arsenal ត្រឹមតែ៧ខែទៀតប៉ុណ្ណោះ ចាប់តាំងចាកចេញពី Real Madrid កាលពីឆ្នាំ២០១៣ក្នុងតម្លៃ៤៥.៥លានផោនផ្ទេរមកលេងនៅ Arsenal ហើយនៅរដូវកាលនេះ រូបគេមានព័តមានជាប់ទាក់ទងមកលេងនៅMan Utd នឹងក្លឹបជាច្រើនទៀតក្នុងតំបន់អឺរ៉ុប។
ប៉ុន្តែ Man Utd គឺជាក្លឹបដែលជាប់ទាក់ទងក្នុងការផ្ទេរយក Ozil ខ្លាំងជាងគេ ខណៈកីឡាករសញ្ជាតិអាល្លឺម៉ង់វ័យ២៩ឆ្នាំ ធ្លាប់មានស្នាដៃជោគជ័យបំផុតនៅ Real Madrid ក្រោមការដឹកនាំរបស់គ្រូបង្វឹក Man Utd បច្ចុប្បន្នលោក Jose Mouronho។
និយាយក្នុងទូរទស្សន៍ BT Sport អំឡុងការប្រកួតដែល Man Utd ឈ្នះ Arsenal ៣ទល់១ Rio Ferdinand បាននិយាយថា គាត់ពិតជាសប្បាយរីករាយណាស់បើឃើញកីឡាករនាំលេងរូបនេះពាក់អាវរបស់ Manchester United ក្នុងពេលអនាគត។
” ចាប់តាំងពីគាត់ចុះកុងត្រាលេងនៅក្របខណ្ឌ Premier League គាត់បានបង្កើតឱកាស និងបញ្ជូនបាល់បានច្រើនណាស់ហើយអ្វីដែលគាត់ធ្វើបានកន្លងមកអាចបញ្ជាក់ថាគាត់ស្ថិតក្នុងស្ដង់ដារកីឡាករខ្ពស់កម្រិតណាហើយ”។
” ខ្ញុំធ្លាប់លេងទល់នឹងគាត់ពេលដែលគាត់នៅ Real Madrid ហើយកាលនោះគាត់ជាកីឡាករខុសពីអ្វី ដែលគាត់លេងនៅទីនេះ។ គាត់ពិតជាលឿន ហើយបើអ្នកអាចយកគាត់មករួមក្រុម ព្រមទាំងសមត្ថភាពតិកនិកដែលគាត់មាន ខ្ញុំនឹងយកគាត់មក Man Utd ក្នុងកុងត្រាគ្មានតម្លៃខ្លួនដោយមិនចាំបាច់ពិចារណាច្រើនទេ”៕
