ទម្រង់លេងធ្លាក់ចុះរបស់ Real Madrid ក្នុងរដូវកាលនេះ បានបន្សល់ទុកឲ្យអាជីពគ្រូបង្វឹករបស់ Zidane ស្ថិតក្នុងភាពមិនច្បាស់លាស់ ប៉ុន្តែគ្រូបង្វឹកសញ្ជាតិបារាំង មិនខ្វល់អ្វីទាំងអស់គឺគាត់យកចិត្តទុកដាក់ទៅលើការប្រកួតជាមួយ Levante។
Zinedine Zidane បានទទួលស្គាល់ ពីទំនាក់ទំនងមកដឹកនាំជំនួសលោកពីសំណាក់គ្រូបង្វឹកផ្សេងទៀត ក្រោយពេលលោកដឹកនាំក្រុមមិនសូវបានផលល្អក្នុងរដូវកាលនេះ។ ទោះបីជាទម្រង់លេងបានប្រសើរបន្តិចក្ដី ក្នុងការប្រកួតឈ្នះ Valencia ៤ទល់១ប៉ុន្តែម្ចាស់ជើងឯកអឺរ៉ុប និងអេស្ប៉ាញមួយនេះកំពុងតាមពីក្រោយ Barcelona ១៩ពិន្ទុ។
ការធ្លាក់ចេញពីពាន Copa del Rey ដោយសារថ្វីដៃ Leganes នៅតែពុះកញ្ជ្រោល ហើយដំណឹងលោក Pochettino ដែលជាបេក្ខភាពមួយក្នុងចំណោមគ្រូបង្វឹកជាច្រើន នឹងមកជំនួសដំណែងរបស់លោកដែលធ្លាប់ជួយក្លឹបឈ្នះពាន Champions League ២ដងក្នុង២រដូវកាលជាប់គ្នា ក៏កំពុងកម្រើក។
អញ្ចឹងក៏ដោយ! លោកបាននិយាយក្នុងសន្និសីទកាសែតមុនការប្រកួតជាមួយ Levante ថា៖” វាអញ្ចឹងហើយ! មិនថាកន្លែងណាទេ សូម្បីតែ Real Madrid តែងតែមានការនិយាយពីការងារគ្រូបង្វឹករៀងរាល់ថ្ងៃ។ ពេលដែលអ្វីមួយស្ថិតក្នុងស្ថានភាពលំបាក ពួកគេនិយាយពីវា ហើយនិយាយពីការប្ដូរ និយាយពីនរណាម្នាក់ដែលមកជំនួស”។
“ តែវាគ្មានប៉ះពាល់អីដល់ខ្ញុំទេ។ វាមិនបានបញ្ឈប់ខ្ញុំ ឲ្យឈប់ធ្វើការងារ និងប្រយុទ្ធស្វែងរកអ្វីដែលខ្ញុំចង់ធ្វើរាល់ថ្ងៃ និងពង្រឹងគ្រប់យ៉ាង។ ខ្ញុំមិនដែលគិតអំពីវាទាំងអស់ ថាអ្វីនឹងកើតឡើងនៅឆ្នាំក្រោយ ខ្ញុំមិនខ្វល់ទេ“៕
