ប្រធានក្រុម Paris Saint-Germain កីឡាករ Thiago Silva ជឿថាការតាមបិទខ្សែប្រយុទ្ធ Barcelona កីឡាករ Messi ពិបាកជាងខ្សែប្រយុទ្ធ Real Madrid កីឡាករ Cristiano Ronaldo។
ខ្សែប្រយុទ្ធទាំងពីរបានឈ្នះពាន Ballon d’Or ៥គ្រឿងដូចគ្នា ខណៈដែលកីឡាករទាំងពីរក៏ជាតារាស៊ុតបញ្ចូលទី បានច្រើនជាងគេបំផុតប្រចាំក្លឹបរបស់ខ្លួនផងដែរ។ ប៉ុន្តែ Silva ដែលនឹងត្រូវតាមបិទ Ronaldo ពេល PSG លេងក្នុងពាន Champions Leagueវគ្គ១៦ក្រុមចុងក្រោយថា Ronaldo មិនសូវពិបាកការពារនោះទេ។
“ វាពិតជាពិបាកការពារ Messi ជាង Ronaldo ។ Cristiano Ronaldo សាកសមនឹងឈ្នះអ្វីៗគ្រប់យ៉ាងដែលគាត់បានឈ្នះក្នុងអាជីពរបស់គាត់។ ឆ្នាំពិតជាឆ្នាំដ៏ពិបាកបន្តិចហើយសម្រាប់គាត់ប៉ុន្តែវាមិនទាន់ហួសពេលនោះឡើយ ។គាត់នៅមានឱកាសឈ្នះពាន Ballon d’Or”Silva និយាយក្នុងកាសែត Le10Sport។
“ ភាពខុសគ្នាបន្តិចបន្តួចរវាងពួកគេទាំងពីរគឺថា Messi ពេលមានបាល់ គឺជួបមួយញាក់មួយ ជួបពីរញាក់ពីរ ជួបបីញាក់បីដែលពិបាកក្នុងបញ្ឈប់ណាស់។ ពួកគេទាំងពីរសុទ្ធតែជាកីឡាករដែលធ្វើរឿងដ៏អស្ចារ្យ Neymar ក៏ដូចគ្នាដែរ”។
ក្រុមឈរកំពូលតារាងLigue 1, PSG នឹងត្រូវធ្វើដំណើរមកជួបReal Madrid នៅកីឡដ្ឋាន Santiago Bernabeu សម្រាប់ការប្រកួតជើងទីមួយវគ្គ១៦ក្រុមចុងក្រោយនៅថ្ងៃទី១៤កុម្ភៈ៕
