អតីតគ្រូបង្វឹកក្លឹប Manchester United លោក Louis van Gaal អាចនឹងត្រឡប់មកក្នុងក្របខ័ណ្ឌ Premier League វិញដោយសារមានការចាប់អារម្មណ៍ពីក្លឹបSouthampton និង Crystal Palace។
Van Gaal មិនមានការងារធ្វើនោះទេ ចាប់តាំងពីត្រូវបាន Man Utd ដកដំណែងកាលពីមួយឆ្នាំមុន គឺប៉ុន្មានថ្ងៃក្រោយជួយក្លឹបមួយនេះឈ្នះពាន FA Cup ហើយលោកមានគោលបំណងចង់សម្រាកពីពិភពបាល់ទាត់រយៈពេលយូរ។
បើតាមប្រភព Mirror បាននិយាយថា គ្រូបង្វឹកសញ្ជាតិហុល្លង់បើកផ្លូវចង់ត្រឡប់មកដឹកនាំក្លឹបនៅ Premier League វិញហើយរបាយការណ៍ខាងលើបានបន្តថា Van Gaal មានជម្រើស២ក្នុងប្រទេសអង់គ្លេសរបស់ពិចារណា នោះគឺ Southampton និង Crystal Palaceបង្ហាញការចាប់អារម្មណ៍គ្រូបង្វឹក៦៥ឆ្នាំ។
Southampton គ្រោងនឹងដកដំណែងលោក Claude Puel ក្រោយពេលជួបរដូវកាលមួយដ៏យ៉ាប់យ៉ឺន ហើយក្លឹបខាងលើចាប់អារម្មណ៍កំណត់ត្រាដឹកនាំរបស់Van Gaal។ Palace វិញកំពុងស្វែងរកគ្រូបង្វឹកថ្មីក្រោយពេលបាត់បងលោក Sam Allardyce ក្រោយចប់រដូវកាលលើសពីនេះក្លឹបក៏បានទាក់ទងលោក Sean Dyche, Claudio Ranieri និង Brendan Rodgersផងដែរ។
Van Gaal មានកំណត់ត្រាដឹកនាំឈ្នះ៥២.៤%កាលនៅ Man Utd ប៉ុន្តែអតីតគ្រូបង្វឹកជម្រើសជាតិហុល្លង់ ត្រូវបានគេរិះគន់ទម្រង់លេងដ៏គួរឲ្យធុញទ្រាន់ របស់គាត់៕
