បាល់ទាត់៖ អតីតគ្រូបង្វឹក Real Madrid លោក Fabio Capelloបានបរិយាយថា វរបុរសប្រេស៊ីល Ronaldo គឺជាកីឡាករម្នាក់ ដែលគាត់ធ្លាប់បង្វឹកដោយលំបាកបំផុត ព្រោះថាក្នុងអាជីពជាគ្រូបង្វឹករបស់គាត់គ្មានកីឡាករពិបាកខ្លាំង Ronaldo នេះឡើយ។
Capello ធ្លាប់ដឹកនាំ Real Madrid លើកទី២ក្នុងឆ្នាំ ២០០៦ហើយជួយក្លឹបយក្សមួយនេះឈ្នះពាន La liga ប៉ុន្តែគាត់បានបង្ហាញផលពិបាកមួយថា Ronaldo ធ្លាប់ធ្វើឲ្យគាត់ក្រពុលមុខខ្លាំង គឺពិបាកបង្វឹកខ្លាំងណាស់ពិសេស អតីតខ្សែប្រយុទ្ធរូបនេះចង់សម្រកទម្ងន់។
តាមអ្នកយកព័ត៌មានរបស់ Fotball Italia បានដកស្រង់សម្ដីរបស់អតីតគ្រូបង្វឹកខាងលើថា៖” រឿងដែលខ្ញុំលំបាកបំផុតក្នុងអាជីពជាគ្រូបង្វឹកនោះ គឺបង្ហាត់Ronaldo ។ ខ្ញុំនឹងប្រាប់អ្នកថាហេតុអ្វី ។ កាលខ្ញុំនៅដឹកនាំ Real គាត់ទើបជាពីរបួស ហើយចង់ចូលលេងវិញក្នុងវិច្ឆិកាហើយខ្ញុំក៏យល់ព្រម តែពេលនោះគាត់មានទម្ងន់ដល់ទៅ៩៦គីឡូក្រាម ដូចជាកីឡាករប្រដាល់ទម្ងន់យក្សម្នាក់អញ្ចឹង។ ”
“ខ្ញុំក៏បានសួរគាត់ថា គាត់ទម្ងន់ប៉ុន្មាន ពេលជួយប្រេស៊ីលឈ្នះ World Cup គាត់ឆ្លើយថា ៨៤គីឡូ ហើយខ្ញុំក៏ឲ្យគាត់សម្រកយ៉ាងហោចណាស់បាន៨៨គីឡូសិន។ វាដូចតែគ្នាទេ គាត់មិនចង់សម្រកទម្ងន់ឲ្យតិចជាងនេះហើយ ទីបំផុតគាត់ធ្វើបានត្រឹម៩៤គីឡូក្រាម។ កាលនោះខ្ញុំដាក់ឲ្យគាត់លេងបីប្រកួតដោយចាប់ដៃគូជាមួយ Ruud Van Nistelrooy ហើយយើងចាញ់ទាំងបីប្រកួត។”
ឆ្នាំនោះ Ronaldo មិនបានបង្ហាញទម្រង់លេងល្អនោះទេ ក្នុងពាក់កណ្ដាលរដូវកាលដំបូងឆ្នា ២០០៦/២០០៧ ដោយរកបានតែមួយគ្រាប់ក្នុងការចូលលេង ៧ប្រកួតហើយក្រោយមករូបគេក៏ចាកចេញទៅចូលរួមជាមួយ AC Milan។ ចំណែក Capello ក៏ត្រូវបានដកដំណែងក្នុងឆ្នាំ ២០០៧ដែរ ដោយសារដឹកនាំក្រុមបង្ហាញទម្រង់លេងមិនសូវល្អ ទោះបីជួយក្លឹបលើកពានក៏ដោយ។ បន្ទាប់មកគាត់ក៏ប្ដូរមកដឹកនាំក្រុមជម្រើសជាតិអង់គ្លេសបន្តបន្ទាប់ រហូតចុងក្រោយគាត់ត្រូវបានសហព័ន្ធបាល់ទាត់រុស្សីបញ្ចប់ដំណែងគ្រូបង្វឹកឆ្នាំ២០១៥៕
ប្រភព៖ squawka
ប្រែសម្រួល៖ សៅណាត
