ក្លឹបឈរលេខ២ក្នុង Premier League រដូវកាលមុន Tottenham បានចេញមកតថ្លៃយកខ្សែបម្រើ Real Madrid, Mateo Kovasic ក្រោយពេលម្ចាស់ជើងឯកChampions League មួយនេះចង់លក់ខ្សែបម្រើចេញក្នុងរដូវដោះដូរកីឡាករដែលកំពុងដំណើរការ។
Kovasic បានស៊ីញេកុងត្រាជាមួយ Real Madrid ពីក្លឹប Inter Milan កាលពីឆ្នាំ២០១៥ក្នុងកុងត្រា៦ឆ្នាំ ដោយបានមកចូលរួមជាមួយមិត្តរួមជម្រើសជាតិ ហើយក៏ជា Idol របស់ខ្លួន Luka Modric នៅ Bernabeu។ បែបនេះក្ដី!ខ្សែបម្រើសញ្ជាតិក្រូអាតរូបនេះ ហាក់ពិបាកប្រជែងដំណែងជម្រើសដំបូងក្នុងក្រុមរបស់លោក Zinedine Zidane ដោយបានលេងជម្រើសដំបូងត្រឹម១៩ដងក្នុង La liga កាលពីរដូវកាលមុនហើយលេងពេញ៩០នាទីបាន៩ប្រកួតប៉ុណ្ណោះ។
ប្រភព Standard Sport បានដឹងថាម្ចាស់ជើងឯក Champions League កំពុងពិចារណាលក់ Kovasic ខណៈកីឡាករវ័យ២៣ឆ្នាំទទួលបានការចែចង់ពីក្លឹបមួយចំនួននៅអឺរ៉ុប។ Spurs គឺជាអ្នកមកតថ្លៃមុនគេ ប៉ុន្តែកុងត្រារយៈពេលវែងរបស់ខ្សែបម្រើជម្រើសជាតិក្រូអាតរូបនេះ ធ្វើឲ្យក្លឹបអង់គ្លេសខាងលើចំណាយលុយច្រើនបន្តិច។
ជម្រើសរបស់ Real Madrid ក្នុងការលក់កីឡាករលេងក្នុងតំបន់បម្រើនេះគឺ ក្លឹបចង់បានលុយខ្លះ ទៅបង្គ្រប់ក្នុងការទិញខ្សែប្រយុទ្ធ Kylian Mbappe ដែលមានតម្លៃខ្លួនថ្លៃទោះបីជា Real Madrid ត្រូវបានគេដឹងថាមានលុយច្រើនយ៉ាងណាក៏ដោយ៕
ប្រភព៖ Standard Sport
