ក្លឹបមហាសេដ្ឋីបារាំង Paris Saint-Germain កំពុងមានបំណងប្រើប្រាស់ Edinson Cavani ជាថ្នូរជាមួយនិងទឹកប្រាក់ដ៏ច្រើន ដើម្បីដេញថ្លៃយកខ្សែប្រយុទ្ធលំដាប់ពិភពលោករបស់ Real Madrid កីឡាករ Cristiano Ronaldo ។ ប្រភព El Confidencial បញ្ជាក់មកដូច្នេះ។
អនាគតវែងឆ្ងាយរបស់ Ronaldo នៅ Madrid ហាក់កំពុងមិនប្រាកដប្រជា ស្របពេលម្ចាស់ពាន Ballond’Or ៥សម័យកាលរូបនេះ នៅតែចង់ក្លាយជាកីឡាករមានតម្លៃប្រាក់ឈ្នួលខ្ពស់ជាងគេបំផុតក្នុងពិភពបាល់ទាត់ ប្រសិនបើគាត់ចង់បន្តកុងត្រាថ្មីនៅកីឡដ្ឋាន Santiago Bernabeu។
តារាងបាល់ទាត់សញ្ជាតិព័រទុយហ្គាល់ គឺជាគោលដៅរបស់ PSG យូរមកហើយ ខណៈក្លឹបខាងលើចង់មានប្រព័ន្ធប្រយុទ្ធមានឥទ្ធិពលបំផុតក្នុងលោក ដោយមានខ្សែប្រយុទ្ធបីនាក់ជូរមុខគឺ Ronaldo, Neymarនិង Kylian Mbappe។ ហើយដើម្បីកាត់បន្ថយតម្លៃ នៃការយកលុយសុទ្ធទាំងដុលៗទៅឲ្យ Real Madrid ក្លឹបមួយនេះនឹងបូកខ្សែប្រយុទ្ធលេខ៩របស់ខ្លួនគឺEdinson Cavani ដើម្បីឲ្យ Real Madrid ព្រមលក់ Ronaldo។
ខ្សែប្រយុទ្ធអ៊ុយរូហ្គាយរូបនេះ ត្រូវបានគេចាត់ទុកថាជាកីឡាករមានឥទ្ធិពលបំផុត ក្នុងចំណោមខ្សែប្រយុទ្ធក្នុងលោកហើយជាកីឡាករប្រកបដោយគុណភាពខ្ពស់ទៀតផង៕
