បើតាមសម្ដីរបស់អតីតខ្សែបម្រើជម្រើសជាតិអង់គ្លេសម្នាក់បាននិយាយថា ប្រសិនបើ Marcus Rashford ចង់រក្សាដំណែងជម្រើសដំបូង១១នាក់ក្លឹបណាមួយ គាត់ចាំបាច់ត្រូវតែចាកចេញពី Manchester United ។
ខ្សែប្រយុទ្ធវ័យក្មេងមិនបានចូលលេងក្នុងជម្រើសដំបូងណាមួយក្នុង Premier League តាំងតែពីខែធ្នូមកម្ល៉េះ ហើយការមកដល់របស់ Alexis Sanchez ធ្វើឲ្យរូបកាន់តែបាត់បង់ឱកាសចូលលេងទ្វេដងសូម្បីតែបម្រុងក៏ដោយ។
និយាយក្នុងកម្មវិធី Premier League Daily, អតីតកីឡាកររបស់ Chelsea, Dannis Wise ថា៖” ពេលខ្លះគាត់មិនបានលេងពេញលេញ និងទៀងទាត់នោះទេដែលនេះនឹងធ្វើឲ្យគាត់កាន់តែធ្លាក់ទម្រង់លេងកាន់តែខ្លាំងទៅៗហើយ។ មានកីឡាករប្រកបដោយគុណភាពជាច្រើននាក់ត្រូវបាននាំចូល។ មាន Lukaku ដែលកំពុងតែព្យាយាមធ្វើឲ្យខ្លួនឯងអាចរកបានគ្រាប់បាល់។ ខ្ញុំមិនប្រាកដថាគាត់ (Rashford)នឹងបានធ្វើនោះទេ។ សូម្បីតែ Lakaku ក៏មិនបានបង្ហាញទម្រង់លេងណាស់ណាដែរ។ Sanchez ជាកីឡាករម្នាក់ទៀតដែលលោក Jose Mourinho នាំចូលមក។ មិនដឹងថាតើ Rashford ត្រូវលេងពេលណាកាន់តួនាទីណានោះទេ”។
“ កាលដែលគាត់លេងប្រយុទ្ធស្លាបញឹកញាប់វាមិនមែនជាតួនាទីចម្បងរបស់គាត់នោះដែរ ប៉ុន្តែខ្ញុំគិតថាកន្លែងណាក៏គាត់លេងដែរឲ្យតែគ្រូបង្វឹកដាក់ ព្រោះគាត់ចង់លេងខ្លាំងណាស់”។
Rashford នឹងត្រូវបានគេសង្ឃឹមថាអាចមានឈ្មោះក្នុងជម្រើសជាតិអង់គ្លេសលេងនៅ World Cup តែយ៉ាងណារូបគេចាំបាច់បំផុត ត្រូវបានចូលលេងទៀងទាត់សិន។ ពេលជួប Chelsea ក្នុង Premier League ខាងមុខប្រហែលជាកីឡាករវ័យ២០ឆ្នាំរូបនេះមានឱកាសវិញហើយ៕
