ក្រុមស្ដេចស Real Madrid បានរំពឹងថានឹងប្រកាសពីការបន្តកុងត្រាថ្មីរបស់ខ្សែបម្រើ Isco ក្នុងអនាគតឆាប់ៗនេះហើយ។
កីឡាករពូកែញាក់រូបនេះ បានក្លាយជាកីឡាករសំខាន់របស់លោក Zinedine Zidane ហើយរូបគេក៏បានរក្សាជាកីឡាករល្បីនៅតំបន់អឺរ៉ុប ដែលមានការចុះផ្សាយច្រើនពីទម្រង់លេងក្នុងការប្រកួតជាមួយអ៊ីតាលី។
កីឡាករវ័យ២៥ឆ្នាំបានបង្ហាញទម្រង់លេងល្អស្ទើរមិនគួរឲ្យជឿដោយបានទាត់បញ្ចូលទី២គ្រាប់ ពិសេសការញាក់បាល់ស៊ីប្រឡោះជើង Marco Verratti ។ កុងត្រារបស់គេនៅសល់តែមួយឆ្នាំទៀតប៉ុណ្ណោះជាមួយ Real Madrid ប៉ុន្តែតាមរបាយការណ៍មកពីប្រទេសអេស្ប៉ាញបញ្ជាក់ថា កុងត្រាថ្មីនឹងចុះហត្ថលេខានៅពាក់កណ្ដាលសប្ដាហ៍ក្រោយ។
ការចុះកុងត្រាបន្តនឹងធ្វើឲ្យកីឡាកររួចផុតពីព័ត៌មានចចាមអារ៉ាមហើយ Real Madrid នឹងរក្សាបាននូវកីឡាករល្អរបស់ខ្លួន។ រដូវកាលមុន កីឡាករជម្រើសជាតិអេស្ប៉ាញបានក្លាយជាកីឡាករម្នាក់ដែលកើនទម្រង់លេងខ្លាំងជាងគេ ក្នុងចំណោមកីឡាករពាក់អាវរបស់ស្ដេចសទាំងអស់ ខណៈអតីតកីឡាកររបស់ Malaga រូបនេះ រកបាន១០គ្រាប់និងបញ្ជូនបាល់បាន៩ដងក្នុងចំណោម៣០ប្រកួតក្នុង La liga៕
