មកដល់វគ្គ៨ក្រុមចុងក្រោយ Barcelona បានចូលរួមជាមួយ Real Madrid និង Sevilla ក្នុងនាមជាក្រុមមកពីអេស្ប៉ាញដើម្បីចាប់គូជួបគ្នានៅខែក្រោយ។
អញ្ចឹងក៏ដោយប្រធានក្រុម Barcelona កីឡាករ Andrea Iniesta បានបញ្ជាក់ថាមិនចង់ឲ្យជួបក្រុមមកពីអេស្ប៉ាញដូចគ្នានោះ។ Real Madrid ជាគូរប្រជែងពានស្លាប់រស់មានមូលដ្ឋាននៅទីក្រុងម៉ាឌ្រីដ ខណៈដែល Sevilla ជាក្រុមមកពីខេត្ត Andalusia ហើយសុទ្ធតែជាក្រុមខ្លាំងក្នុងពានលំដាប់អឺរ៉ុប។
និយាយក្រោយចប់ការប្រកួតកាលពីយប់មិញ ប្រធានក្រុមអ្នកមានបុណ្យមួយនេះបាននិយាយដូច្នេះ៖” មិនចង់ជួបក្រុមអេស្ប៉ាញដូចគ្នាទេ ពីព្រោះយើងបានដឹងពីគ្នាទៅវិញទៅមកអស់ហើយ។ បើអាចខ្ញុំមិនចង់ជួបពួកគេទេ ទោះមួយណាក៏ដោយ”។
“ខ្ញុំតែងតែមានបំណងឈ្នះ Champions League ប៉ុន្តែវាពិបាកណាស់។ លេងមិនបានល្អត្រឹមតែមួយប្រកួត អ្នកនឹងធ្លាក់។ គោលបំណងធំបំផុតគឺកាត់បន្ថយកំហុសដោយសារខ្ញុំជឿថា យើងមានក្រុមមួយនឹងទម្រង់លេងល្អ ដើម្បីឈ្នះវា”៕
