ខ្សែការពារជម្រើសជាតិអ៊ីតាលី Giorgio Chiellini បានទម្លាយពីរបៀបតែមួយគត់ ដើម្បីបញ្ឈប់ខ្សែប្រយុទ្ធ Barcelona កីឡាករ Lionel Messiឲ្យជាប់។
ពេលអ្នកកាសែតសួរពីការលេងរបស់ Messi ក្នុងជំនួបកន្លងមកទាំងនៅក្លឹប និងជម្រើសជាតិ Chiellini គ្មានភាពស្ទាក់ស្ទើរក្នុងឆ្លើយនោះទេ។
“ ប្រសិនបើអ្នកព្យាយាមតាមបិទគាត់ដោយផ្ទាល់ គឺមិនអាចទេ គាត់ដឹងមុនថាយើងចង់បិទគាត់របៀបណាហើយ។ យើងនឹងមិនបានប៉ះខ្លួនគាត់នោះទេ“។
បែបណាក្ដី! Chiellini ដែលគេចាត់ទុក ជាខ្សែការពារល្អក្នុងពិភពលោកជាងមួយទសវត្សមកហើយនោះ ជឿថាវាអាចទៅរួចដើម្បីទប់ទល់នឹងឥទ្ធិពលរបស់ Messi ក្នុងការញាក់បាល់។
“ វិធីតែមួយដែលរក្សាគាត់ ស្ថិតក្នុងសម្ពាធរបស់យើង គឺជាកិច្ចខិតខំរបស់ក្រុមទាំងមូល។ អ្នកអាចក្លាយជាខ្សែការពារល្អបំផុតក្នុងពិភពលោក ប៉ុន្តែអ្នកគ្មានសង្ឃឹមនឹងបិទគាត់ជិតតែម្នាក់ឯងនោះទេ។ អ្នកត្រូវធ្វើការធ្ងន់ ហើយសហការជាក្រុម ហើយកុំព្យាយាមតាមបិទតែម្នាក់ឯង។ ពិសេសកុំឲ្យមិត្តរួមក្រុមរបស់គាត់ បញ្ជូនបាល់ដល់ជើងរបស់គាត់ បើមិនអញ្ចឹងទេ អ្នកត្រូវជួបហានីភ័យ កាតលឿង ក្រហម និងបាល់ពិន័យមិនខាន”៕
