Romelu Lukaku ត្រូវរងចាំបន្តិចសិន ដើម្បីក្លាយជាអ្នករកគ្រាប់បាល់ច្រើនជាងគេបំផុត ឲ្យជម្រើសជាតិបែលហ្សិក ទោះបីជាប្រទេសមួយនេះ បានទទួលស្គាល់និងចាត់ទុក Lukaku ជាអ្នកកាន់កំណត់ត្រានេះ។
ខ្សែប្រយុទ្ធ Manchester United រកបាន២គ្រាប់ក្នុងលទ្ធផល៣-៣ជាមួយមិកស៊ិក កាលពីថ្ងៃសុក្រសប្ដាហ៍មុន ក្រោយពេលរកបាន១គ្រាប់ទៀត ក្នុងការប្រកួតឈ្នះជប៉ុន១-០ កាលពីថ្ងៃអង្គារ។ សហព័ន្ធបាល់ទាត់បាល់ទាត់បែលហ្សិក បានប្រកាសក្នុងបណ្ដាញ Twitter ផ្លូវការរបស់ខ្លួនថា ខ្សែប្រយុទ្ធរូបនេះរកបាន៣១គ្រាប់ឲ្យជម្រើសជាតិដែលធ្វើឲ្យគាត់បំបែកកំណត់ត្រាររកគ្រាប់បាល់ច្រើនជាងគេ របស់អតីតកីឡាករ Bernard Voorhoof និង Paul van Himst ដែលរកបាន៣០គ្រាប់ក្នុងជម្រើសជាតិបែលហ្សិក។
.@RomeluLukaku9 is now our all time topscorer! ⚽️ Congrats Big Rom! #BELJAP #RoadToRussia pic.twitter.com/6I3yw6KgAP
— BelgianRedDevils (@BelRedDevils) November 14, 2017
បែបណាក្ដី! Lukaku រកបានគ្រាប់បាល់ជាផ្លូវការបានត្រឹមតែ២៨គ្រាប់ប៉ុណ្ណោះ ក្រោយ FIFA មិនរាប់បញ្ជូនគ្រាប់បាល់ដែលរូបគេ រកបានពេលលេងមិត្តភាពជាមួយលុចហ្សំប៊ួ ដែលកាលនោះ Lukaku រកបានហែតទ្រីក។
កាលនោះបែលហ្សិក ប្រកួតក្នុងទីក្រុង Gank កាលពីថ្ងៃទី២៦ខែ ឧសភា ឆ្នាំ ២០១៤ប៉ុន្តែ FIFA បានដកគ្រាប់បាល់នេះចេញពីកំណត់ត្រាផ្លូវការ ក្រោយជម្រើសជាតិមួយនេះ ធ្វើការដោះដូរកីឡាករដល់ទៅ៧នាក់លើសកំណត់ដូរចេញរបស់FIFA។ នេះមានន័យថាការចូលលេងដំបូងរបស់ Adnan Januzaj ក៏មិនត្រូវបានទទួលស្គាល់ដោយ FIFA ដែរ។
អញ្ចឹងក៏ដោយ អតីតខ្សែប្រយុទ្ធ Everton នៅមានពេលវេលាច្រើនណាស់ ក្នុងការរកគ្រាប់បាល់លើសពី៣០គ្រាប់នៅពេលដែលបែលហ្សិកត្រូវប្រកួតមិត្តភាពឆ្នាំក្រោយ ខែមីនាត្រៀមវគ្គផ្ដាច់ព្រ័ត្រ World Cup៕
