ខ្សែបម្រើ Manchester United កីឡាករ Marouane Fellaini នឹងមិនបន្តកុងត្រាថ្មីជាមួយក្លឹបនោះទេ ហើយរូបគេរៀបចំចាកចេញពី Old Trafford ក្នុងខែមករានេះហើយ។
ខ្សែបម្រើជម្រើសជាតិបែលហ្សិកនឹងផុតកុងត្រានៅរដូវកាលនេះហើយ ប៉ុន្តែគាត់មិនចាប់អារម្មណ៍នឹងការបន្តកុងត្រាថ្មីជាមួយក្លឹបនោះទេ។ គេបានដឹងថាលោក Jose Mourinho ចង់រក្សាគាត់នៅ Old Trafford ប៉ុន្តែហាក់មិនបានទាក់ចិត្តឲ្យអតីតកីឡាកររបស់ Everton រូបនេះនៅបន្តនោះឡើយ។
តាមប្រភព៖ Express, បានរាយការណ៍ថា Fellani គ្មានគោលបំណងបន្តលេងនៅ United ទៀតទេ ហើយរូបគេចាប់ផ្ដើមរកទ្រនំថ្មីសម្រាប់ខ្លួនគេផ្ទាល់រួចទៅហើយ។ កីឡាករម្នាក់នេះត្រូវបានគេគិតថា ដោយសារតែមិនបានលេងទៀងទាត់ក្នុងរដូវកាលនេះ ខណៈចូលពាក់កណ្ដាលរដូវកាលទៅហើយរូបគេទើបចាប់ផ្ដើមបាន៤ប្រកួតប៉ុណ្ណោះ។
តាមរបាយការណ៍ដដែល បានបន្ថែមថា គាត់អាចនឹងរៀបចំខ្លួនចេញនៅខែមករា ដើម្បីរកកន្លែងលេងទៀងទាត់យកកៅអីក្នុងជម្រើសជាតិសម្រាប់លេង World Cup វាស្របពេលដែលមានក្លឹបនៅចិនបានដាក់សំណើមកបណ្ដើរៗផងនោះ។
ខណៈពេលដែល Fellaini នឹងក្លាយជាកីឡាករគ្មានតម្លៃខ្លួនដដែលនោះ Man Utd នឹងបិទការផ្ទេរចេញហើយរក្សាគាត់ដល់ចប់រដូវកាលតែម្ដង៕
