កាលពីថ្មីៗនេះគ្រូបង្វឹកក្រុមកាំភ្លើងធំ Arsenal លោក Arsene Wenger ស្ថិតក្នុងប្រទេសចិនហើយត្រូវជួប Chelsea ក្នុងការប្រកួតមិត្តភាពអន្តរជាតិនាកីឡដ្ឋាន Bird’s Nest Stadium ។
អំឡុងពេលធ្វើសន្និសីទកាសែតមុនការប្រកួតលោក Arsene Wenger បាននិយាយការផ្ដល់ដំបូន្មានដល់លីកកំពូលចិនថាត្រូវពង្រឹងកីឡាករក្នុងស្រុកហើយអភិវឌ្ឍន៍យុវជនថ្នាល។
លោកបាននិយាយក្នុងបទសម្ភាសន៍មួយកាលពីថ្ងៃសៅរ៍ដូច្នេះថា៖”បើចង់ឲ្យ Chinese Super League ក្លាយជាលីកកំពូលខ្លាំងលើលោក និងមានកម្រិតខ្ពស់ ចិនត្រូវកែប្រែកីឡាករក្នុងស្រុក ឲ្យក្លាយជាកីឡាករមានគុណភាពកំពូលៗលំដាប់ Super Star ។ កីឡាករគួតែខ្លាំងកម្រិតកំពូល ហើយកើតចេញពីកីឡាករល្អក្នុងស្រុក។ ”
” ពេលនេះពួកគេជាកីឡាករអាជីពពេញលេញនៅឡើយទេ ហើយពួកគេយកកីឡាករបរទេសមកពង្រឹង ចុះកីឡាករក្នុងស្រុកយ៉ាងម៉េចដែរ ពួកគេល្អកម្រិតណា? ខ្ញុំមិនដឹងទេ ខ្ញុំមិនដឹងថាតើកីឡាករវ័យក្មេងរបស់ចិនល្អកម្រិតណា។”
“ ពេលមួយដែលខ្ញុំធ្លាប់ធ្វើការនៅប្រទេសជប៉ុន ខ្ញុំឃើញថាពួកគេធ្វើការខ្លាំងជាមួយនឹងការពង្រឹងប្រព័ន្ធយុវជនថ្នាលរបស់ខ្លួនពួកគេធ្វើការធ្ងន់ដោយព្យាយាមចម្លងការអភិវឌ្ឍន៍ យុវជនថ្នាលក្នុងតំបន់អឺរ៉ុប ហើយពួកគេធ្វើបានយ៉ាងល្អ ខ្ញុំគិតថានេះជាឧទាហរណ៍ដ៏ល្អសម្រាប់ចិនមើលគំរូជប៉ុន”៕
ប្រភព៖Daily Mail
