បន្ទាប់ពីការចាកចេញរបស់ Neymarក្រុម Barcelona កាន់តែមានទម្រង់លេងរឹតតែល្អក្នុងរដូវកាលនេះ ឈានដល់ចំណុចកំពូលមួយនៅក្នុងប្រវត្តិសាស្ត្ររបស់ក្រុម នេះបើតាមការអះអាងរបស់អ្នកចាំទីសញ្ជាតិអាល្លឺម៉ង់ Marc Andre ter stegen។
Neymarបានចេញទៅចូលរួមជាមួយក្រុមអ្នកមាន PSG ចំពេលដែល Barcelonaកំពុងជួបបញ្ហាខ្វះកីឡាករក្នុងក្រុម ហើយត្រូវបានគូប្រជែងស្លាប់រស់ RealMadrid បំបាក់យ៉ាងចាស់ដៃ៥ទល់និង២ ក្នុងព្រឹត្តិការណ៍ពានមុនបើករដូវកាល Super Copa de Espana ដែលនាំឲ្យមានការរិះគន់ជាខ្លាំងពីសំណាក់អ្នកគាំទ្រ ចំពោះទម្រង់លេងដ៏អន់ថយនៅពេលនោះ។
ទោះជាយ៉ាងណាក៏ដោយ គ្រូបង្វឹកថ្មីលោក Ernesto Valverde បានព្យាយាមកែសម្រួលចន្លោះប្រហោងនានា និងបានប្រើប្រាស់ទម្រង់លេងថ្មីដើម្បីសម្របទៅនិងស្ថានភាពដែលក្រុមពុំមាន Neymar ជាអ្នកនាំលេងដ៏ល្អដូចពីមុន។ជាលទ្ធផលជាក់ស្ដែង Barcelona បានចាប់ផ្ដើមរដូវកាលថ្មីនេះ ដោយលេងចាញ់តែមួយប្រកួតប៉ុណ្ណោះ និងកំពុងរក្សាកំណត់ត្រាមិនដែលចាញ់ក្នុងលីក La Ligaរហូតដល់២៤ប្រកួតជាប់គ្នា និងដាច់ពិន្ទុគូប្រជែង Real Madrid យ៉ាងឆ្ងាយរហូតដល់១៧ពិន្ទុ។
ទោះបីជាដៃគូប្រយុទ្ធរួមគ្នាទាំងបីនាក់ MSNត្រូវបានបាត់បង់ហើយ តែ stegen នៅតែមានជំនឿថា ការបាត់បង់នេះនឹងជំរុញឲ្យកីឡាករក្នុងក្រុមមានការប្រឹងប្រែងកាន់តែខ្លាំង ហើយវាជាកម្លាំងមួយដែលជំរុញទឹកចិត្តអោយក្រុមរឹតតែទទួលបានជោគជ័យបន្ថែមទៀត។
៖”សមត្ថភាពរបស់ Neymarគឺអ្នកមិនអាចប្រកែកបានទេគាត់ពិតជាលេងល្អមែនទែន ហើយគាត់ជាកីឡាករម្នាក់ដ៏មានសារសំខាន់នៅក្នុងក្រុម ក៏ដូចជាសមាជិកគ្រួសាររបស់ពួកយើង។ ខ្ញុំគិតថាគ្រប់គ្នាគួរតែយល់ពីអ្វីដែលគាត់ចង់ធ្វើប្រហែលជាគាត់ចង់ឈ្នះពានផ្ទាល់ខ្លួនអោយបានច្រើន”។
ក្នុងរដូវកាលនេះ Barcelonaបាននាំកីឡាករ២នាក់ដើម្បីប៉ះប៉ូវកន្លែងរបស់ Neymar គឺ Ousman Dembele និង
Philippe Coutinho ដែលមានតម្លៃខ្លួនសរុបគឺជិត៣០០លានអឺរ៉ូ ដែលជាកំណត់ត្រាមួយដ៏ថ្លៃក្នុងការទិញកីឡាករ។
Barcelona និងត្រូវធ្វើដំណើរទៅកាន់ទឹកដីរបស់ក្រុមតោខៀវChelsea ដើម្បីប្រកួតChampion League វគ្គ១៦ក្រុមចុងក្រោយជើងទី១នាថ្ងៃពុធនេះ ដោយលោកValverdeបាននាំយកកីឡាករល្អៗទាំងអស់នៅក្នុងក្រុម ដើម្បីត្រៀមក្នុងជំនួបដ៏តានតឹងមួយនេះ លើកលែងតែកីឡាករNelson Semendo ដែលជាប់ពិន័យនិងCoutinho ដែលមិនអាចចូលលេងបាន ព្រោះមានបញ្ហាជាមួយច្បាប់របស់UEFA៕
