ការប្រកួតក្នុងពានរង្វាន់ Confederation Cup2017 វគ្គជម្រុះពូល B ដែលធ្វើការប្រកួតនៅប្រទេសរុស្សី បានដឹងលទ្ធផលហើយដោយក្រុមខ្លាំងអាល្លឺម៉ង់បានត្រឹមស្មើក្រុមជើងឯកមកពីអាមេរិកខាងត្បូងឈីលី ខណៈមួយគូទៀត កាមេរ៉ូនក៏មិនអាចឈ្នះអូស្ត្រាលីបានដែរ។
និយាយពីក្រុមអាល្លឺម៉ង់វិញ ដែលទទួលបានត្រឹមលទ្ធផលស្មើជាមួយឈីលីនោះគឺ ប្រកួតក្នុងកីឡដ្ឋាន Kazan Arena វេលាម៉ោង១ និង០០នាទីយប់។ ខ្សែប្រយុទ្ធ Alexis Sanchez របស់ក្រុមកាំភ្លើងធំ Arsenal ជាអ្នករកគ្រាប់បាល់នាំមុខឲ្យក្រុមជើងឯក Copa America នាទី៦ដើមវគ្គទីមួយ។ រហូតដល់នាទី៤១ជិតចប់តង់ទីមួយហើយ ទើបខ្សែប្រយុទ្ធ Lars Stindl របស់ក្លឹប Borussia Mönchengladbachរកគ្រាប់តាមស្មើវិញ ខណៈវគ្គទី២គ្មានការបន្ថែមគ្រាប់បាល់ទៀតទេ។
[youtube id=”hqbBKV8NLmI”]
មួយគូរទៀតក្នុងពូល B នេះដែរ ក្រុមជើងឯកអាហ្វ្រិក កាមេរ៉ូនត្រឹមចែកគ្នាមួយពិន្ទុម្នាក់ជាមួយជើងឯកអាស៊ី អូស្ត្រាលី។ ចុងវគ្គទីមួយពោលគឺនាទី៤៥ខ្សែបម្រើAndre Anguissaរបស់ក្លឹប Marseille រកគ្រាប់បាល់នាំមុខមុនប៉ុន្តែចូលវគ្គទី២ Mark Milligan ទាត់បាល់ពិន័យ១១ម៉ែត្រឲ្យកង់ហ្គូរ៉ូអូស្ត្រាលីតាមស្មើហើយលទ្ធផលនេះបន្តរហូតដល់ចប់ការប្រកួត។
[youtube id=”tjMOJO7D37o”]
ឆ្លងកាត់២ប្រកួតកន្លងមក ក្រុមឈីលីនិងអាល្លឺម៉ង់ឈរលេខ១លេខ២ មាន៤ពិន្ទុដូចគ្នា ខណៈអូស្ត្រាលី និងកាមេរ៉ូនឆ្លងកាត់២ប្រកួតមានមួយពិន្ទុប៉ុណ្ណោះ៕
