ក្លឹបបិសាចក្រហមបានសម្រេចចិត្តលក់ខ្សែប្រយុទ្ធស្លាប Adnan Januzaj ទៅឲ្យ ក្លឹបអេស្ប៉ាញក្នុងតម្លៃ៩.៧លានផោន នេះបើតាមប្រភពគេហទំព័រជិតស្និត manutdseason។
អាជីពរបស់កីឡាករជម្រើសជាតិបែលហ្សិកបានធ្លាក់ចុះខ្លាំង ក្នុងរយៈពេល២ឆ្នាំចុងក្រោយហើយពេលនេះ កីឡាករលែងស្ថិតក្នុងគម្រោងជម្រើសដំបូងរបស់លោក Jose Mourinho រដូវកាលក្រោយខណៈក្លឹបព្រមឲ្យរូបគេចាកចេញក្នុងតម្លៃខ្លួនដ៏ទាបមួយ។
កុងត្រារបស់ Adnan Januzaj នៅសល់សុពលភាពមួយឆ្នាំទៀតនៅ Old trafford ប៉ុន្តែគ្រូបង្វឹកព័រទុយហ្គាល់បានសម្រេចចិត្តលក់ចេញ ហើយក្រោយមានក្លឹបជាច្រើនទាក់ទងចង់បាន។ កីឡាករវ័យ២២ឆ្នាំបានចំណាយពេល១រដូវកាលខ្ចីជើងនៅ Sunderland ក្រោមការដឹកនាំរបស់អតីតគ្រូបង្វឹក Man Utd លោក David Moyes ប៉ុន្តែរូបគេមិនបានបង្ហាញថ្វីជើងបានល្អ ខណៈកាលពី២ឆ្នាំមុនបានលេងក្នុងលក្ខខណ្ឌខ្ចីជើងនៅ Dortmund ដែរតែនៅតែយ៉ាប់ដដែល។
Roma មានចំណាប់អារម្មណ៍ចង់បានក្នុងរដូវក្ដៅនេះប៉ុន្តែតាមប្រភព france football បញ្ជាក់ថា Red Devil បានយល់ព្រមជាមួយក្លឹប Real Sociedad លេងក្នុង La liga។
ក្រោយដំឡើងមកឈុតធំក្នុងរដូវកាល២០១៣/១៤ រូបគេបានបង្ហាញថ្វីជើងបានល្អ ហើយត្រូវបានគេរំពឹងថា ជាតារាបាល់ទាត់ល្បីនៅថ្ងៃមុខ ប៉ុន្តែរូបគេបែរជាធ្លាក់ទម្រង់លេងកែលែងឡើងទៅវិញ។ ក្នុងឆ្នាំនោះរូបគេលេងបាន៣៥ប្រកួត និងរកគ្រាប់បាល់បាន៤គ្រាប់ហើយបើនិយាយសរុបទាំងអស់រូបគេលេងបាន៥០ប្រកួតរកគ្រាប់បាល់បាន៦គ្រាប់៕
