ក្រោយ PSG យកឈ្នះ Montepellier កាលពីចុងសប្ដាហ៍មុន Neymar បាននិយាយទៅកាន់កាសែតប្រេស៊ីលជាច្រើនអំពីការគោរពរបស់ខ្លួនទៅកាន់ Cristiano Ronaldo ក៏ដូចការប្រកួត Champions League ជាមួយ Real Madrid អញ្ចឹងដែរ។
មួយផ្នែកដែល Neymar និយាយពី CR7 គឺ៖” ខ្ញុំមានការគោរពដល់ស្នាដៃគ្រប់យ៉ាងដែល Ronaldo សម្រេចបាន។ ខ្ញុំឃើញថាខ្លួន ឯងចង់ជោគជ័យដូចគាត់អញ្ចឹង។ គាត់ស្ថិតក្នុងកម្រិតកំពូលជាង១០ឆ្នាំទៅហើយ គឺដូច Messi ដែរ។ យើងទាំងអស់គ្នាចង់ជោគជ័យដូចពួកគាត់។ Real Madrid គឺលើសពី Ronaldo មានកីឡាករជាច្រើននៅទីនោះ”។
និយាយពីការជួបគ្នាក្នុង Champions League វគ្គ១៦ក្រុមចុងក្រោយ តារាបាល់ទាត់ប្រេស៊ីលបានបន្តថា៖” រឿងសំខាន់សម្រាប់ពួកយើងគឺឡើងទៅវគ្គ៨ក្រុមចុងក្រោយ មិនថាខ្ញុំជាកីឡាករល្អបំផុតលើពិភពលោកអីនោះទេ។ គោលបំណងពួកយើងគឺឈ្នះពាន League, Cup និង Champions League។ វាជារឿងសំខាន់របស់ពួកយើង ហើយពានបុគ្គលនឹងមកតាមក្រោយ។ ការប្រកួតនេះដូចជាវគ្គផ្ដាច់ព្រ័ត្រមួយអញ្ចឹង ។ វាគួរឲ្យខ្មាសដែរ ដែលយើងជួបគ្នាលឿនពេកក្នុងពានរង្វាន់មួយនេះ”។
ក្រោយមានព័ត៌មានចចាមអារ៉ាមទាក់ទងនឹងផ្ទេរទៅលេងនៅ Real អតីតខ្សែប្រយុទ្ធ Barca បាននិយាយដូច្នេះ៖ “ ខ្ញុំធ្លាប់និយាយរួចហើយ វាគ្រាន់តែជាព័ត៌មានមិនច្បាស់ការណ៍ប៉ុណ្ណោះ។ ពេលនេះខ្ញុំកំពុងទ្រាំសិន ហើយរីករាយជាមួយមិត្តរួមក្រុម រីករាយជាមួយទម្រង់លេងរបស់ខ្ញុំ និងគ្រាប់បាល់ដែលខ្ញុំរកបាន។ ខ្ញុំមកទីនេះដើម្បី បង្កើតប្រវត្តិសាស្ត្រស្វែងរកអ្វីដែលល្អបំផុតសម្រាប់ខ្លួនឯង វាតែងតែជាព័ត៌មានចចាមអារ៉ាម”៕
