ខណៈពេលដែល Robert Lewandowski មានព័ត៌មានចចាមអារ៉ាមផ្ទេរទៅលេងនៅ Real Madrid កាន់តែជិតស្និតខ្លាំងឡើងៗនោះ ពេលនេះ Bayern Munich បានបង្ខំចិត្តចាប់ផ្ដើមបើកទ្វារចាក់សោរទូដែក យកកញ្ចប់លុយទិញខ្សែប្រយុទ្ធមកជំនួស។
បន្ទាប់ពីធ្វើការស្ទាបស្ទង់ទៅលើលីកកំពូលនៅអឺរ៉ុបទាំងអស់ ពួកគេរកឃើញកីឡាករ២នាក់ដែលអាចជំនួសបាន។កីឡាករទីមួយគ្មានអ្វីដែលគួរឲ្យភ្ញាក់ផ្អើលនោះទេ ខណៈក្រុមយក្សអាល្លឺម៉ង់មួយនេះចាប់អារម្មណ៍ Harry Kane នោះ។ ទី២ គឺខ្សែប្រយុទ្ធឡើងជើងខ្លាំងរបស់ក្លឹប RB Leipzig កីឡាករ Timo Werner ដែលគេចាត់ទុកថា ជាអនាគតរបស់បាល់ទាត់អាល្លឺម៉ង់។
ទោះបីជាយ៉ាងនេះក្ដី! កីឡាករទាំងពីរនាក់នេះ ហាក់ពិបាកទិញយកមកលេងបន្តិចហើយ ពីព្រោះ Kane ជាកីឡាករដែលគេចង់បានបំផុតក្នុងពិភពបាល់ទាត់ហើយ Tottenham គ្មានបំណងលក់ម៉ាស៊ីនរកគ្រាប់បាល់របស់ខ្លួននោះទេ តែបើចង់ទិញខ្លាំងណាស់នោះ តម្លៃ ២០០លានអឺរ៉ូអីហ្នឹងអាចនិយាយគ្នាបាន។
ចំណែក Werner វិញបានបញ្ជាក់ច្បាស់ហើយថា គាត់នឹងនៅបន្តជាមួយក្លឹប Lipzig ដល់រដូវកាលក្រោយ ដើម្បីអភិវឌ្ឍន៍ទម្រង់លេងឲ្យកាន់តែខ្លាំង ស្របពេលដែលក្លឹបពេលនេះកំពុងឡើងកូនមកលេងក្នុង Champions League ហើយក្លាយជាគូប្រជែងពាន Bundesliga ២ឆ្នាំជាប់គ្នាទៀតនោះ៕
