ខ្សែការពារស្លាបកំពុងឡើងជើង Philipp Max ជឿថាក្របខ័ណ្ឌ Premier League គឺពិតជាលីកដ៏សាកសម សម្រាប់ស្តាយ៍លេងរបស់ខ្លួន ប៉ុន្តែអ្នកជំនាញដោះដូរកីឡាករថារូបគេប្រហែលជានៅលេងជាមួយ Augsburgបន្តទៀតក្នុងខែមករានេះ។
ខ្សែការពារស្លាបឆ្វេងរូបនេះ គឺជាអតីតសមាជិកក្នុងក្រុមជម្រើសជាតិអាល្លឺម៉ង់ ឈ្នះមេដាយប្រាក់ក្នុងព្រឹត្តិការណ៍ 2016 Olympics ហើយបច្ចុប្បន្ននេះ រូបគេកំពុងទទួលបានការចាប់អារម្មណ៍ពីក្លឹបលេងនៅ Premier League មួយចំនួនដូចជា៖ Manchester City, Manchester United, និង Liverpool ។
សមត្ថភាព និងទម្រង់លេងឡើងចុះក្នុងតំបន់ស្លាបរបស់កីឡាករម្នាក់នេះ កំពុងតែឡើងខ្លាំងក្នុងរដូវកាល2017/18 ហើយអ្វីដែលគួរឲ្យកត់សម្គាល់កីឡាករវ័យ២៤ឆ្នាំ បញ្ជូនបាល់ឲ្យមិត្តរួមក្រុមបាន១០ដងក្នុងការចូលលេង១៧ប្រកួតនៅរដូវកាលនេះក្នុងក្របខ័ណ្ឌ Bundesliga ។
អញ្ចឹងក៏ដោយ! Max នៅជាប់កុងត្រាជាមួយ Augsburg ដល់ឆ្នាំ២០២២ ហើយរូបគេបាននិយាយក្នុងកាសែតអាល្លឺម៉ង់Sport Bild ថាការផ្ទេរចេញក្នុងខែមករានេះនឹងមិនអាចកើតឡើងនោះទេ៕
