គ្រូបង្វឹកក្រុមកាំភ្លើងធំ Arsenal លោក Arsene Wenger បានប្រកាសថាលោកនឹងចាកចេញពីក្រុមមួយនេះពេលចប់រដូវកាលនេះហើយ។
ការចាកចេញនេះមានន័យថាលោកនឹងឈប់ធ្វើជាគ្រូបង្វឹកមុនពេលផុតកុងត្រាជាមួយក្លឹបមុនមួយឆ្នាំ។ Arsenal កំពុងឈរលេខ៦ក្នុងរដូវកាលនេះក្រោយខកខានដណ្ដើមដំណែង Top 4 ២រដូវកាលជាប់គ្នា ខណៈដែលក្ដីសង្ឃឹមតែមួយគត់ដែល Arsenal បានលេង Champions League គឺឈ្នះពាន Europa League។
Wenger វ័យ៦៨ឆ្នាំធ្លាប់ឈ្នះពាន Premier League ៣ដងនិងពាន FA Cup ៧ដងហើយនៅឆ្នាំ១៩៩៨និង២០០២លោកនាំក្លឹបមួយនេះឈ្នះពានលីគផងនិងខាប់ផង។ សម្រង់សម្ដីចុះផ្សាយក្នុងកាសែត BBC លោកបាននិយាយថា៖” ខ្ញុំសូមអរគុណចំពោះការផ្ដល់សិទ្ធឲ្យខ្ញុំដឹកនាំក្លឹបអស់ពេលជាច្រើនឆ្នាំ។ ខ្ញុំដឹកនាំក្លឹបដោយការប្ដេជ្ញាចិត្តនិងសុចរិតភាព។ ជូនទៅដល់អ្នកគាំទ្រ ចូររក្សាតម្លៃក្លឹប”។
ដឹកនាំដំបូងកាលពីឆ្នាំ១៩៩៦ Wenger គឺជាគ្រូបង្វឹកនៅ Premier League ដែលកាន់តួនាទីគ្រូបង្វឹកយូរជាងគេបំផុតហើយនាំក្លឹបប្រកួតបាន៨២៣ប្រកួតឈ្នះ ៤៧៣ ស្មើ ១៩៩និងចាញ់ ១៥១ប្រកួត៕
