កំពូលកីឡាករ Cristiano Ronaldo ធ្លាប់មានកំណត់ត្រាមួយនៅអង់គ្លេសកាលពីគេនៅលេង Manchester United ក្នុងរយៈពេល១០ឆ្នាំមកនេះមិនទាន់មាននរណាអាចបំបែកបាននោះទេ គឺ Ronaldo បានក្លាយជាកីឡាករដែលអាចស៊ុតបញ្ចូលទីបានដល់ទី៤២គ្រាប់នាគ្រប់ការប្រកួត ក្នុងមួយរដូវកាលដោយប្រើពេលត្រឹមតែ៤៩ប្រកួតប៉ុណ្ណោះ ។
កំណត់ត្រានេះគាត់ធ្វើបានកាលពីរដូវកាល២០០៧-២០០៨ ជាមួយ Manchester United។ តែកំណត់ត្រាដ៏អស្ចារ្យនេះហាក់មិនមានសុវត្ថិភាពនោះទេ ខណៈដែលតារាជើងស៊ុត Harry Kane បានធ្វើព្យុះភ្លៀងគ្រាប់បាល់ស្ទើរគ្រប់ការប្រកួតនារដូវកាលនេះ ដោយគេរកបាន៣៥គ្រាប់ហើយត្រឹមតែ៣៦ប្រកួតប៉ុណ្ណោះ ខណៈដែលការប្រកួតរបស់ក្រុម Tottenham Hotspur នៅសល់ប្រហែល៣ខែទៀតទើបចប់។
បើតាមការប៉ានស្មាន Kane អាចបំបែកកំណត់ត្រាមួយនេះនៅមុនចប់រដូវកាល ដោយសារការប្រកួតក្នុងលីកនៅសល់រហូតដល់ទៅ១០ប្រកួតឯណោះ។ ក្នុងពានFA Cup ពួកគេបានឡើងទៅវគ្គបន្ដក្រោយយកឈ្នះ Rochadale ៦ទល់និង១។ ខណៈក្នុងពានអឺរ៉ុប UEFA Champion League, Spur ត្រូវលេងជើងទី២ ជាមួយ Juventus ក្រោយស្មើគ្នា ២-២ នៅទឹកដីអ៊ីតាលី។
Spur ជាក្រុមដែលលេងខ្លាំងនៅក្នុងដី ជាក់ស្ដែងពួកគេបានបំបាក់ក្រុមយក្ស Real Madrid៣ទល់និង១ យ៉ាងគួរអោយភ្ញាក់ផ្អើល។ កាលពីដើមរដូវកាលគ្មាននរណាជឿថាក្រុមមាន់ខ្នាយមាសនេះ អាចឆ្លងផុតវគ្គចែកពូលបាននោះទេដោយសារតែមានក្រុមខ្លាំងៗជាច្រើនដូចជា Real Madrid និង Borussia Dortmund ជាដើម។
នាជំនួបជើងទី២ ជាមួយ Juventus ពួកគេត្រូវការត្រឹមតែសូន្យស្មើប៉ុណ្ណោះ ដើម្បីឡើងទៅវគ្គបន្ដ។ ចាំមើលទាំងអស់គ្នាតើ Harry Kane អាចបំបែកកំណត់ត្រារបស់ Ronaldo បានរឺអត់?
The Sun
